Alet
Alet (Squalius cephalus)
Systematik
Ordnig: Charpfenartigi (Cypriniformes) Familie: Charpfefisch (Cyprinidae) Underfamilie: Leuciscinae Gattig: Leuciscus Art: Alet
Wüsseschaftlige Name
Squalius cephalus
(Linnaeus, 1758)

De Alet (Squalius cephalus, früener au Leuciscus cephalus; alemanischi Näme) isch e aapassigsfääige Süesswasserfisch, wo vor alem i Flüss lebt. Er isch nööch verwandt mit em Cavedano (Squalius squalus), wo im Tessin und i de Poebni voorchunnt.

Uussie

De Alet isch e längliche Fisch mit eme braite Chopf, wo öppe 30 bis 60 cm lang werd un 9 kg wöge cha. Er het e brüünliche Körper mit groosse herte Schuppe. Sini Schwanzflosse het hüüffig e dunkle Rand.

Verbraitig

De Alet chunt i fast ganz Europa vor und feelt im Süüde und im hööche Norde. Er lebt i Flüüssgwässer, won e mittelstarchi Strömig hend und streckewiis e sandige oder chiisige Bode uufwiiset. Er bruucht au guet biwachsni flächeri Stelle und ruigi Gumpe. Im Früelig und im Summer cha de Alet au im Uuferberiich vo Standgwässer biobachtet were.

Lebeswiis

D Laichzitt got vom Mai bis in Juli, wenn d Wassertemperatur öber 12 Grad stiigt und findet a flachere Stele, hüüffig i chlinnere Nebebäch, statt. S Wiibli lait abertuusigi vo Aier, wo am Chiis chlebe bliibet. D Laarfe und di junge Aletli lebet i groosse Schwärm i Uufernööchi und lebet vo Pflanze. Si wered mit vieri gschlechtsriiff, wenn si öber 20 cm lang sind. Älteri Alet bildet chliini Gruppe oder wered zo Ainzelgänger und fresset au Tier, wie Schnegge oder Würmer und au Fischlaich. Alet chönd 15 Joor alt were.

Büecher

• Stefan Ineichen (Hrsg.): Stadtfauna, 600 Tierarten der Stadt Zürich; Bern 2010; ISBN 978-3-258-07561-7
• R. P. Smith: The distribution and habitat requirements of chub (Leuciscus cephalus L.) in several lowland rivers of eastern England. PhD Thesis, University of East Anglia, Norwich, 1989.
• Günther Sterba: Süßwasserfische der Welt. Weltbild Verlag, Augsburg 2002, S. 313 ISBN 3-89350-991-7.
• Bent J. Muus und Preben Dahlström: Süßwasserfische, BLV Verlagsgesellschaft mbH, 8. Auflage, 1998, ISBN 978-340-511867-9.
• Christian Teubner, Kerstin Mosny: Das große Buch vom Fisch, Teubner Edition, ISBN 3-7742-2053-0.

Weblink

 Commons: Alet – Sammlig vo Multimediadateie

• Alet uf Fishbase.org (englisch)

• Leuciscus cephalus in dr Rote Lischt vu dr gfehrdete Arten vu dr IUCN 2008. Yygstellt vu: Freyhof, J. & Kottelat, M, 2008. Abgruefe am 10. Februar 2014