Apollo

Apollo

Systematik
Ordnig: Falter (Lepidoptera)
Familie: Ritterfalter (Papilionidae)
Underfamilie: Parnassiinaede
Gattig: Parnassius
Untergattig: Parnassius
Art: Apollo
Wüsseschaftlige Name
Parnassius apollo
(Linnaeus, 1758)

De Apollo (Parnassius apollo) isch e groosse Summervogel wo i de Alpe haimisch isch. S gitt meriri lokaali Underaarte, wo e bitzeli andersch uusgsiend.

Verbraitig

De Apollo chunnt nume i de Alpe und i de Voralpe vor und isch bis uf 2000 müM z finde. Im Noorde goot sis Verbraitigspiet bis zu de Donau und de Schwööbische Alb. Er mag sunnigi Häng, felsigi Gegete und bivorzugt chalkigi Böde. Er suugt a de Blüete vo Tistle (Carduum sp.) und Gaisszötteli (Centaurea sp.).

Uussie

De Apollo isch e wiisse Summervogel, wo uf de Vorderflügel schwarzi Tupfe het. Uf de Hinderflügel het er rooti Tupfe mit eme schwarze Rand und eme wisse Fleck i de Mitti. Bi de Wiibli sind di hindere Flecke eener oraasch. De Körper isch grau. Sini Spannwiiti bitrait 70 bis 85 mm.

Jooreszyklus

d Raupe vom Apollo

Im Augste wered d Aier glait. E Tail vo de Raupe schlüüfft no im Herbst, de ander Tail schlüfft erst im Aprile. Si fressed nume wenn d Sune schiint und hocked de Rest vo de Zitt under Stai. Im Juni verstecked si sich under Stai und Mies und tüend sich verpuppe. De Falter schlüüfft i zwoo bis vier Wuche und flügt bis in September.

Raupe

D Raupe werd 50 mm lang und isch schwarz und het uf de Siite e Raie vo oraasche Tupfe und chorzi schwarzi Hoor. D Raupe isch uf d Wiissi Muurpfeffer (Sedum album) spezialsiert, mengisch fresst si au a de Huusroose (Sempervivum tectorum). Si fresst nume wenn d Sune schiint.

Lueg no

Literatur

Weblink

 Commons: Roter Apollo – Sammlig vo Multimediadateie
Kategorie