D Benediktiner (latiin. Ordo Sancti Benedicti, OSB) si en kontemplativ usgrichdete Orde in dr römisch-katholische Chille. Au im Anglikanismus und do und dört im Luthertum si benediktinischi Chlöster erhalte bliibe. Dr Orde het dr Naame vo sim Gründer Benedikt vo Nursia (* um 480; † 547) übernoo und gältet as dr eltist Orde im westlige Ordelääbe.
Dr Grundsatz vom Orde isch „Ora et labora et lege“ (latiinisch: „Due bäte und schaffe und lääse“). Dr Benediktinermönch läbt noch dr benediktinische Ordensreegle Regula Benedicti und läit im Lauf vo sim Ordenslääbe drei Glübd ab:
- „Stabilitas“ (Beständigkäit in dr Gmäinschaft),
- „Chlösterlige Lääbenswandel“ und
- „Ghorsam“.
As e Motto vo de Benediktiner cha gälte: „Ut in omnibus glorificetur Deus – Für dass Gott in allem verherrligt wurd.“
