Dr Franz Beyerle (volle Name Franz Sales Nikolaus Beyerle, * 30. Jänner 1885 z Konschtanz; † 22. Oktober 1977 z Wange bi Radolfzell) isch e dytsche Jurischt un Räächtshischtoriker gsii.
Lääbe
Dr Franz Beyerle isch us ere kadoolische Jurischtefamilie chuu. Sy Vater, dr Konschtanzer Räächtsaawalt Karl Beyerle, het si in verschiidene kadoolische Barteie engaschiert. Sy Brueder isch dr Räächtswisseschaftler un Zäntrumsbolitiker Konrad Beyerle gsii, sy Schweschter d Pedagoogi un Bolitikeri Maria Beyerle. Är isch syter 1928 ghyroote gsii mit dr Erika Maria, geb. Joswich. Us dr Eh sin drei Sihn fiirigange, dodrunter dr Hatto Beyerle (Dirigänt) un dr Burkhart Beyerle (bildende Chinschtler).
Noch em Bsuech vum Konschtanzer Humanistische Gimnaasium isch er vu 1898 bis 1902 uf d Chlooschterschuel Seckau/Steiermark gange, anne 1903 het er as Exteerne sy Abituur gmacht. Derno het er Räächtswisseschafte an dr Uniwersideet Breslau studiert un ab 1905 an dr Uniwersideet Fryburg. 1905 isch er us kadoolische Chilche uusdrätte („Germaanische Haid“). Anne 1907 het er sy Stuudium an dr Uniwersideet Göttingen abgschlosse. 1907 het er sy Staatsbriefig z Fryburg im Brysgau abglait un isch Räächtspraktikant z Konschtanz woore. 1910 isch er an dr Göttinger Uniwersideet bim Ferdinand Frensdorff promoviert woore. Anne 1913 het er si z Jena bim Karl Rauch habilitiert. No freiwilligem Chriegsdienscht im Erschte Wältchrieg isch er 1915 verwundet woore (Verstyyfig vum räächte Bai).
Dr Franz Beyerle het scho ab 1913 as Privatdozänt an dr Uniwersideet Jena glehrt; 1917 isch er deert zum usseroordelige Profässer ernännt woore. 1918 isch er an d Uniwersidet Baasel gruefe woore in dr Noofolg vum Hans Planitz un em Eckard Meister. 1929 isch er an Uniwersideet Greifswald gwägslet, 1930 an d Uniwersideet Frankfurt am Main, 1934 an d Uniwersideet Leipzig un 1938 an d Uniwersideet Fryburg as Noofolger vum Walther Merk. 1941 isch er korreschpondierend Mitgliid vu dr Haidelbärger Akademy vu dr Wisseschafte woore. 1953 isch er z Fryburg emeritiert woore, sy Noofolger isch dr Hans Thieme woore.
Dr Beyerle het in Lehr un Foorschig di dytsch Räächtsgschiicht, s Privaaträächt, s buurgerli Räächt, s dytsch buurgerli Räächt, s dytsch Räächt un sy Gschiicht verdrätte.
Är isch Voorsitzer vun ere Spruchchammere vu dr Entnazifizierigskummissioon gsii, drotzt ass er 1933 em NS-Jurischtebund byydrätte gsii isch.[1] 1955 isch er mit dr Ehredokterwiird Dr. phil. h. c. vu dr Uniwersideet Frankfurt am Main uuszaichnet woore. 1963 het en dr Verain fir Gschiicht vum Boodesee un syre Geegnig zum Ehremitgliid ernännt.[2]
Näbe syne wisseschaftlige Publikatione het er ab un zue au Gedicht uf Alemannisch in verschidene Zytschrifte vereffetligt.
