Jagst | ||
![]() Dr Lauf vo dr Jagst mit em lingge Noochberfluss Kocher vo dr Kwelle oobe vo Lauchheim bis zur Mündig in Neckar | ||
Date | ||
---|---|---|
Laag | Dütschland, Bade-Württeberg, Hesse | |
Flusssystem | Rhy | |
Quellgebiet | im Östlige Albvorland bim Dorf Walxheim vo Underschneidheim 48° 56′ 24″ N, 10° 18′ 48″ O | |
Quellhöchi | 518 m ü. NHN | |
Mündig | bi Bad Friedrichshall-Jagstfeld in dr NeckarKoordinate: 49° 14′ 1″ N, 9° 10′ 43″ O 49° 14′ 1″ N, 9° 10′ 43″ O | |
Mündigshöchi | 142,8 m ü. NHN | |
Höchiunterschiid | 375,2 m | |
Lengi | 189,9 km
|
|
Rächti Nääbeflüss | Röhlinger Sechta, Rechenberger Rot, Reiglersbach, Gronach, Brettach, Ette, Erlebach, Kessach, Seckach, Schefflenz | |
Linggi Nääbeflüss | Orrot, Speltach, Maulach, Sindelbach | |
Stausee | Stausee Stockmühli, Hochwasserzruckhaltbecki Buch | |
Mittelgroossi Stedt | Ellwangen, Crailsheim | |
D Jagst an iirem Underlauf. Bräiti Stromschnelle bi Undergriesheim. |
D Jagst isch e Middelgebirgsfluss im Norde vo Baade-Württebärg. Näben em Kocher und dr Enz ghöört si zu de drei grösste Nääbeflüss vom Neckar. Si isch 189,9 Kilometer[1] lang uf em Lauf mit em Naame Jagst[2] und eso die lengsti vo deene drei Nääbeflüss. S Daal vo dr Jagst, wo bsundrigs am middlere Lauf e seer ländlige Charakter het, gält as landschaftlig apaartig. Nivellierendi Maassnaame wie Gwässerusbau, Begraadigunge oder Fluerberäinigunge häi s Landschaftsbild an dr middlere und undere Jagst weeniger stark veränderet, als mä s vilmol in Flusslandschafte vo Flüss mit ere vergliichbaare Gröössi cha beobachte. Wäge deene Äigeschafte isch si us landschaftspfläägerischer Sicht intressant. Es git e Hufe Aarte vo Pflanze, Dier und Biotooptüpe, und d Flechine, wo d Siidlige und dr Verchehr bruuche, si relatiiv chlii. Das git dr Jagst und iirem Daal wägen em Entwiggligspotenziaal, wo mit däm Zuestand verbunde isch, us dr Sicht vom Natuurschutz e groossi Bedütig. Chliini und chliinsti Stedt, wo s middelalterlige bis früenöizitlige Stadtbild zum e groosse Däil bhalte häi, bräge s Jagstdaal genauso wie e Hufe Burge und Schlösser oobe uf de Bärg über em Daal und au d Müüline em Fluss nooch, wo in gwüsse Abschnitt rächt hüfig si.
Dr Naame Jagst isch zum erste Mol 768 as Däil vom Gaunaame Jagesgouwe (Jagstgau) noochgwiise. 1024 wird Jagas erwäänt und 1371 Jagst. Dr Uursprung vom Naame isvh vorgermaanisch, vermuetlig keltisch, s -t am Ändi isch erst in dr spootmiddelhochdütsche Zit draa ghangt worde. Er wird zur indogermanische Wortwurzle *ieg- gstellt, wo Iis bedütet. D Jagst wäär also dr chalt, iisigi Fluss.[3] Dr Naame isch mänggisch au Jaxt und Iaxt gschriibe.