S Lexikon des Mittelalters (LMA, LexMA o. ä.) isch e Lexikon uf Dütsch zur Gschicht und Kultuur vom Middelalter. Es het nüün Bänd und äi Registerband und umfasst 36'000 Ardikel. Es isch vom ene internazionaale Autoorekollektiiv verfasst worde. Dr Robert-Henri Bautier het s mit dr Gloria Avella-Widhalm, Ulrich Mattejiet und Robert Auty uusegee. Dr Zitruum, wo din behandlet isch, goot vo dr Spootantike bis zum Aafang vo dr Nöizit um s Joor 1500, wobii au Büzanz und die araabischi Wält berücksichtigt wärde.
Es gältet allgemäin in dr Mediävistik as unverzichtbaar, au wenn dr Forschigsstand vo de erste Bänd zum Däil überholt isch. S Wärk wird mäistens as LexMA (oder LMA) mit dr Aagoob vo dr Spalte (Sp.) zitiert.
D Originaalusgoob isch vo 1977 aa erschiine. D Bänd 1 (1980) bis 6 (1993) si im Artemis- beziejigswiis im Artemis-&-Winkler-Verlag Münche und Züüri uusecho, d Bänd 7 (1995) bis 9 (1998) im LexMA-Verlag Münche. E Registerband isch 1999 z Lache am Züürisee veröffentligt worde.
Es git s Lexikon au as Studieusgoob bim Metzler-Verlag Stuttgart / Weimar 1999 (ISBN 3-476-01742-7, 2002 as Daschebuechusgoob bim dtv (ISBN 3-423-59057-2).