Dr Wayne Shorter (* 25. Augschte 1933 z Newark, New Jersey; † 2. Meerz 2023 z Los Angeles)[1] isch e US-amerikanische Jazz-Saxofonischt un -Kumpenscht gsii. Mit em John Coltrane un em Sonny Rollins het er zue dr „voorderschte Linie“ vu dr Saxofonischte im Modern Jazz gheert. Sy Spiil isch as poetisch, reetselhaft un glyychzytig natyyrli un in sich vellig logisch karakterisiert woore.[2] Dr Saxofonischt zellt zue dr Jazzmuusiker, wu Stil bildet hän. Är giltet as ain vu dr wiichtischte un yyflussryychschte Interpreete vu dr Jazzgschiicht.[3][4]
.jpg)
Dr Shorter het aafangs fir dr Horace Silver un dr Maynard Ferguson gspiilt, voreb er ab 1959 zue dr Jazz Messengers vum Art Blakey chuu isch. Är isch musikaalische Laiter vu dääne woore, voreb er ab 1964 uf Embfählig vum John Coltrane vum Miles Davis abgwoorbe wooren isch. RÄ het aber au unter aigenem Name Albe vereffetligt, wu arg globt woore sin, wie 1964 Night Dreamer as sy eerscht Album fir Blue Note Records. Vu 1964 bis 1969 isch er – näb em Herbie Hancock, em Ron Carter un em Tony Williams – Mitgliid vum zwaite „klassische“ Miles-Davis-Quintett woore. Fir des het er vyl Kumpesizioone gschriibe het, wu zue Klassiker woore sin, dodrunter d Stugg Footprints un Nefertiti. Dr Shorter isch dr riichtig Noofolger fir dr John Coltrane in dr Gruppe vum Davis. Um die Zyt het er au bi Blue Note unter sym Name d Quartett-Ufnahm JuJu mit mit dr Beglaiter vum Coltrane, em McCoy Tyner un em Elvin Jones yygspiilt.[5]
Anne 1970 het er zäme mit em Keyboarder Joe Zawinul un em Bassischt Miroslav Vitouš di legendeer Jazz-Rock-Formazioon Weather Report grindet, wu speeter au dr Jaco Pastorius un dr Peter Erskine derzue gheert hän. In dr Zyt vu dr frieje Weather Report isch dr Shorter vum Tenorsaxofoon, wun er bis 1968 uusschließli gspiilt ghaa het, uf s Sopransaxofoon gwägslet. Paralleel het er syter 1976 mit V.S.O.P. au wider akustische Jazz gspiilt.
Syt dr Ufleesig vu Weather Report (noch em Joachim-Ernst Berendt „di erfolgryychscht vu allne Jazz-Rock-Gruppe“) het dr Shorter solistisch gschafft. Är isch mit em Carlos Santana un dr Rolling Stones uf Turnee gange un het uf verschiidene Albe vu dr Joni Mitchell un mit Steely Dan gspiilt. Speeter het er e Quartett mit em Pianischt Danilo Pérez, em Bassischt John Patitucci un em Schlaagzyyger Brian Blade glaitet (CD: Footprints Live!, Beyond the Sound Barrier un Without a Net).
Am 12. Novämber 2021 isch sy Ooperr Iphigenia noch eme Libretto vu dr Esperanza Spalding am Cutler Majestic Theatre z Boston urufgfiert woore. S Biinebild het dr Frank O. Gehry gmacht.[6]
Anne 1985 isch em Shorter sy Doochter Iska Maria (* 1971) noch eme epileptische Aafall gstoorbe.[7] Anne 1996 isch em Shorter Sy Frau Ana Maria (* 1947) un iri Nichte Dalila Lucien, di 17-jehrig Doochter vum Sänger Jon Lucien, bim TWA-800-Flugzyygabsturz vor Long Island ums Lääbe chuu. Anne 1999 het dr Shorter in dritter Eh di brasiliaanisch Sängeri Carolina Dos Santos ghyroote, e ängi Fryndin vu syre verstoorbene Frau. Dr Shorter isch e glaibige bekennender Nichiren-Buddhischt un Aahänger vu dr neie religieese Beweegig Sōka Gakkai gsii.
Dr Shorter isch am 2. Meerz 2023 im Alter vu 89 Johr in eme Chrankehuus z Los Angeles gstoorbe.[8][1]
Lexigraafischi Yydreeg
Anderi Quälle
Commons: Wayne Shorter – Album mit Multimediadateie
|
Dä Artikel basiert uff ere fräie Übersetzig vu dere Version vum Artikel „Wayne_Shorter“ vu de dütsche Wikipedia. E Liste vu de Autore un Versione isch do z finde. |