Da Ixtlilxochitl Ometochtli(Nahua:Bliah da Pita) woa da 4 Tlahtoani vo de Acolhua in Tetzcuhco. Sei Reich woa zwoa bei weidm ned so Groß, wia des vo de Tepanekn. Owa im Toi vo Mexiko woas des Oanzige des vo de Tepanekn nu unobhengig woa. Ois se daun da Ixtlilxochitl nu zan Chichimecatecutl, Herr (Kaisa) vo olle Chichimekn wöhn hod lossn, hod des em Tezozomoc, em Huey Tlahtoani (Kaisa) vo de Tepanekn ned gschmeckt. Und so hobms den Schtoot vo de Acolhua bekriagt und eaowad.
Sei Jugand
Da Ixtlilxochitl is im Joah 1380 af d`Wöd kema. Sei Großvota Quinatzin und sei Vota da Techotlalatl hobm de machtign Nochboan de Tepanekn ned außagfoadat. Weus nua iwa an zaumgwüafitn Schtodschtoot, aus mera Vöka und Schprochn gheascht hobm, af de ned oiweu Valoß woa.
Owa da Ixtlilxochitl hod scho fria a guade Ausbüdung ghobd und de bestn Mauna ausm Reich hobm eahm untaricht und a berotn. Ea is vo sein Vota scho ois a junga Beasch zan Midregentn eigsezt wuan.
Ois a nochm Tod vo sein Vota 1409 zan Tlahtoani wuan is, hod a sei Reich zentreua z`regian probiat. Des hod natiali ned olle Hearscha in seim Reich gschmeckt.
Ea hod se daun a nu zan Chichimecatecutli, Herr olla Chichimekn afgschwunga. Dabei hod a ned bdocht, das de Tepanekn jo fraia a Chichimekn woan.
De Naumansglyphn vom Tlahtoani Ixtlilxochitl Ometochtli
Da Tepaneknhearscha Tezozomoc woa a oida Fux. Ea hod em Ixtlilxochitl a boa Boin Woi noch Tetzcuco schicka lossn, mid da Bitt Se megn draus oanige Mantal webm, weu Se jo via eana Kunsthaunweak iwaroi so briahmd waradn.
De Acolhua hobm eahm sei Bitt eafüht und hobm de feati Umhäng zruckgschickt.
Es hod ned laung dauat, daun san kanuweis Agavnfasan und Woiboin noch Tetzcuhco iwan See ummi gschickt wuan. Midm Aftrog: Weus ses jo so guad gmocht hobm, soidns a de Woi nu vaowadn.
Hedn de Acolhua des gmocht, wa des ana tributpflichtign Untaweafung gleikema.
Oiso hobms de Fasan und de Woi wida iwan See ummi zruckgschickt. Mid ana Nochricht, daß fia so a Maßa Materieu weid zweng Leid hedn und dahea soidn se de Tepanekn eahnane Umhäng söwa mocha. Am Bestn soidns glei Ristungan aus dera Baamwoi mocha, den de weans braucha.
Da Kriag
Da Tezozomoc hod nua af des gwoat und hod 1414/1415 de Mexica losgschickt, vaschteakt mit Tepaneknregimenta.
In Owabeföh hod da Tlahtoani vo de Tlalteloko-Mexica da Tlahcateotl woa da Kommandat. Ea und Dea vo Tenochtitlan da Huitzilihhuitl woan jo a seine Enkal.
Nebmbei hod a scho vuahea duach seine Gesaunntn de waunklmiatign Fiaschtn vo mera Altepetl ausm Acolhua-Reich beowatn lossn. Und so sans af sei Seitn ummigwexlt.
Vo Tetzcuhco aus san de Acholhua noch Links affi und owan Texcocosee owi bis za da Tepanekn -Haubdschtod Azcapotzanco, des sogoa belogat hobm.
Ois da Ixtlilxochitl a oigemeine Mobümochung augschoft hod, san nua weng Fiaschtn mid eahnane Kontingent kema.
De Mexica hobm de Acolhua-Haubdstod augriffa, san owa zruckgschlogn woan.
Drafhie hod da Ixtlilxochitl an entlostungsaugriff gschtart.
Ea is mid seine Kriaga Links auffi, in See entlaung, ummi und af da aundan Seeseitn in Sidn owi za da Tepanekn -Haubtschtod Azcapotzanko. Afn Weg duathi hod ea olle Tepaneknschhtäd eaowad und eahna Haubtschtod 144 Tog belogat owa ned einehma kena..
Owa
Da Tepaneknkaisa woa owa ned untätig. Ea hod olle Kriaga aus seim Laund mobülisiat.
De Mexica hod a mid eahnane Schinackln iwan See gschickt.
De Chalca hod a iwazeigt, das aa des Acolhualaund vom Sidn aus auzgreiffa.
Seine Kriaga san daun a iwa des Colhualaund im Sidn ins Acolhualaund eigfoin.
Nochdem se a boa Schtäd eaowad hobm, san bis af Zwoa, olle vom Ixtlilxochitl ogfoin.
Sei End
Em Ixtlilxochitl san nua mea Rickzugsgfecht iwablim.
Ea hod se noch Topanohuayan in de Beag zruckzogn.
Vü Kriaga san eahm neamma gfoigt. A a boa oide Freind aus de leztn zwoa vabündtn Schtäd. Weu ea gauhnt hod, das eahm de varotn wean, hod a seim Suhn, em spodan Netzahualcoyotl augschoft, das a se in ana Baamkron vaschtecka soid, damid de kinigli Linie vo da Tetzcuhco - Herrschafamülie ned ausschtiabt.
Wia a boa Kriaga em Ixtlilxochitl nochakema san, hod a za eahna gsogt: Se soin ruhig mocha wos viahobm.
Drafhi hobms na daschlogn und olle Herrschainsignien ognumma und za de Tepanekn brocht. De nockade Leich hobms oafoch lignlossn.
Sei Suhn da Netzahualcoyotl hod des ois vom Baam owa gseng und vo do au hod sei launge Flucht augfaungt.
A treua Auhenga vom Todn Kini hodn wida Eiklload und vabrennt, wias an gochtn Kini zuschtehd. Sei Oschn hod daun da Wind iwas Laund vawahd.
De Reichsafteulung
De Chalca hobm fia eahna Hüf im Sidn vom Acholhuaschtoot a boa Altepetl kriagd.
De tlalteloko und tenochtoitlan Mexica hobm de Haubdtschtod Tetzcuhco und oinege Schtäd an da Urfaseitn vom See kriagt.
Den Haubtteu hobm se de Tepanekn ois tributpflichti söwa eigschtraft.
Chimalpain Cuauhtlehuanitzin, Domingo. Las ocho relaciones y el memorial de Colhuacan. CNCA. 1998.
Códice Xólotl. Edición facsimilar, con introducción, estudio, interpretación de los glifos y apéndices de Charles E. Dibble. UNAM/Universidad de Utah. 1951.
Códice Techialoyan García Granados. Estudio de Xavier Noguez y Rosaura Hernández. El Colegio Mexiquense. 1992.
