Ojekuaa chipáramo chipa tembi’u oñembojýva tatakuápe ỹrõ ambue hendáicha (Paraguay rembi’ukuéra apytépe oĩ 70 hendaichagua chipa ojekuaa porãva, he’icháicha Margarita Miró Ibars, kuñakarai oikuaa pypukúva tembi’u Paraguái).
Opavave Paraguái rembi’u teéicha, “Chipa so’o” oreko heta caloría. Péicha oiko ymaite guive ha ojehechaukáma mba’ekuaavete rupive.
Peteĩva ko tembi’u apytépe ha oiméne pe hevéva ha hetave proteína orekovahína pe oraháva ijapytépe vaka ro’o Guaranime “so’o”, ha pégui ou pe héra “chipa so’ó”.
Ojejapo hag̃ua “chipa so’o” ojeporu kure ñandy térã vaka kyrakue, ryguasu rupi’a, kesu “Paraguái”, jukyku'i, avatiku'i, aramirõ ha kamby.
Oñembosako’i hag̃ua ojejapova’erã péicha: oñembovu porã pe ñandy hypy’ü ha morotĩ porã meve, péva jajapokuaa ñande pópe. Upéi katu oñemoĩ pype ryguasu rupi’a, juky ha kesu; ko’ãva oñemongu’iporava’erã ha ojepyvu oñemoĩ rire peteĩteĩva. Oñembojehe’a ko’ã mba’e avatiku’i, aramirõ ha kamby ha oñensova porã.
Oñembojehe’a porã rire oñembyapu’apu’a tuichakue mbujapéicha ha ñambokua ñañe kuäme. Pe kua ojejapóvape oñemoingue pe “apyte so’o” ha’evahína ryguasu rupi’a ha so’o “ñemongu’ipyre”. Upéi oñembotyjey ko mba’e apu’a opyta hag̃uáicha peteĩ torta orekóva 7 centímetro rupi ipekue.
Amo hu’ãme oñemoĩ ko’ã torta chapa oñemoñandýva ári ha oñeñohẽ hese kamby, upe rire oñembojy tatakua akuporãme (250°) mokõipa aravo’i pukukue.
Margarita Miró Ibars, kuñakarai oikuaa pypukúva Paraguái rembi’ukuéra, omyesakãháicha, opaichagua chipa, ha ijapytekuéra “chipa so’o”, oĩ umi tembi’u ojeporúva “Týra” ramo apytépe, ko ñe’ẽ guarani ojeporu oñembohéra hag̃ua opaichagua tembi’u oje’úva “kojói”, kamby térã café, ỹrõ katu tembi’u ojeporúva oje’u hag̃ua ambue tembi’u ndive.
"Chipa" ndive oje’u avei "Týra" ramo "mbeju" ha "sópa paraguái".