51.28722222222213.979722222222
Neukirch je wjes a přisłušaca gmejna na zapadźe sakskeho wokrjesa Budyšin, kotraž słuša k zarjadniskemu zwjazkej Kinspork a ma něhdźe 1.700 wobydlerjow.
Geografija
Gmejna Neukirch leži w zapadnej Hornjej Łužicy mjez Kinsporkskej holu na sewjerozapadźe a zapadołužiskimi horami na juhowuchodźe. Susodne gmejny su Sepicy na sewjeru, Kamjenc na wuchodźe, Haselbachtal na juhu a město Kinspork na zapadźe. Kamjenske stare město namaka so dźesać kilometrow wuchodnje wot Neukircha.
Z přerěznje 43 wobydlerjemi na kwadratnym kilometru je gmejnski teritorij poměrnje rědko wobsydleny.
Gmejnske dźěle
Ke gmejnje słušeja slědowace wsy:
- Chojny (Koitzsch), 275 wobydlerjow
- Kočica (Gottschdorf), 259 wobydlerjow
- Neukirch, 460 wobydlerjow
- Šmorkow (Schmorkau), 485 wobydlerjow
- Weißbach, 274 wobydlerjow[2]
Wobchad
Přez Neukirch běži statna dróha 100 mjez městomaj Kinspork a Kamjenc. Wjesny dźěl Šmorkow leži při zwjazkowej dróze 97 (Drježdźany–Wojerecy). Na dwórnišću we Weißbachu zastawachu hač do lěta 1998 wosobowe ćahi wot Drježdźan do Njedźichowa. Čara bu w lětomaj 2004 a 2005 wottwarjena.
Stawizny
Prěnje naspomnjenje Neukircha jako sydło ryćerja Theodericus de Nuenkirchen pochadźa z lěta 1225, tehdy mějachu we wjesce tež hižo cyrkej, po kotrejž so sydlišćo pomjenowaše.[3] Wjesny dźěl Šmorkow naspomni so prěni raz w lěće 1342.[4] Nětčiša gmejna Neukirch bu přez gmejnsku reformu w lěće 1994 z gmejnow Neukirch, Šmorkow, Kočica a Weißbach załožena. Chojny słušeja wot 1999 ke gmejnje.
Politika
Gmejna słuša k sakskemu wólbnemu wokrjesej 54 (Budyšin 3) a k zwjazkowemu wólbnemu wokrjesej 156 (Budyšin I).
Němska
Sakska
