| Pierre Boulez | |
|---|---|
.jpg) | |
| Gebuertsnumm | Pierre Louis Joseph Boulez |
| Gebuer |
26. Mäerz 1925 Montbrison |
| Gestuerwen |
5. Januar 2016 Baden-Baden |
| Nationalitéit | Frankräich |
| Educatioun | Paräisser Conservatoire |
| Aktivitéit | Dirigent, Komponist, Musikolog, Musekstheoretiker, Universitéitsprofesser, Pianist, Museker, Schrëftsteller |
| Member vun | Akademie der Künste der DDR, Akademie der Künste Berlin, Europäesch Wëssenschafts- a Konschtakademie, Deutsche Akademie für Sprache und Dichtung, American Academy of Arts and Sciences, Bayerische Akademie der Schönen Künste, American Academy of Arts and Letters, Academia Nacional de Bellas Artes de Argentina |
 | |
De Pierre Boulez, gebuer de 26. Mäerz 1925 zu Montbrison, am Departement Loire, a gestuerwen de 5. Januar 2016 zu Baden-Baden, war e franséische Komponist, Dirigent a Musektheoretiker.
De Pierre Boulez war zënter den 1950er Joren nieft dem Karlheinz Stockhausen an dem Luigi Nono ee vun den Haaptrepresentante vun der musikalescher Avantgarde, speziell vun der serieller Musek. Hien huet a senge Kompositioune Rationalitéit a Logik mat de poeteschen Traditioune vun der franséischer Musek, absënns vum Impressionismus, kombinéiert.
Hien huet um Paräisser Conservatoire beim Olivier Messiaen an dono bei der Andrée Vaurabourg, dem Arthur Honegger senger Fra, a beim René Leibowitz studéiert. 1946–1956 war hie musikaleschen Direkter vum Théâtre Marigny. 1955–1967 war hien Dozent zu Darmstadt an Dirigent vum Kammerensemble vun do.
1954 gouf hie Gaaschtdiriegent vum Südwestfunk-Orchester zu Baden-Baden. 1966 gouf hien Dirigent vun de Bayreuther Festspiele. Hie war weiderhin vun 1967–1972 Gaaschtdirigent vum Cleveland Orchestra, 1971–1975 Dirigent vum BBC Symphony Orchestra an 1971–1977, als Nofollger vum Leonard Bernstein, vum New York Philharmonic Orchestra.
Zu Paräis huet hien am Centre Beaubourg d'Institut de Recherche et de Coordination Acoustique-Musique (IRCAM) gegrënnt, deem säin Direkter en 1976–1992 war.
Vun den 1990er Joren un huet de Boulez mat enger Rëtsch aneren Ensembelen zesummegeschafft, fir CDen opzehuelen, notamment mat de Berliner an de Wiener Philharmoniker. 2004 huet hien nach eng Kéier de Parsifal zu Beyreuth dirigéiert.
Nieft enger Hellewull anerer Präisser an Auszeechnunge krut hien am Ganze 26 Grammyen a gouf ë. a. zum Commandeur vum Ordre des Arts et des Lettres ernannt a mam Bundesverdienstkreuz ausgezeechent.
| Commons: Pierre Boulez – Biller, Videoen oder Audiodateien |
