ZE-P
Sta paggina chie a l'è scrita in zeneize
co' ina grafia tipo quella do Prian do 1745
Nûvia

A nûvia a l'è 'na massa ciu ò meno esteiza de goççettiñe d'ægoa, de minuscoli crestalli de giaçça ò de goççe e crestalli mescciæ, in sospenscion inte l'aia, de spessô e denscitæ tæ da impedî ciu ò meno a vista do çê.

Percose spesso animæ da di moti scimili a quelli de nuvie ordinaie, de masse d'aia inglobante di produti radioattivi de esploxoin nucleæ atmosfeeghe vegnan inte l'uzo corente denominæ, sciben che impropriamente, nuvie radioattive. Otr'a ço, pe estenscion, o termine nuvia o s'adœuvia pe indicâ di amasci de vapoî despægi da-o vapô d'ægoa e di agglomeræ de mateia cosmica ò stellæ.

E nuvie se forman pe condensaçion do vapô ægoo contegnúo inte l'aia, a prœuvo a raffreidamento de l'aia mæxima. A condensaçion a l'ha començo in genere quande l'umiditæ relativa a l'è maggiô do 100%, saiv'a dî quande l'aia l'è sorvesatura; inte queste condiçioin o vapô ægo o condensa in goççettiñe de raggio ben piccin, generalmente in gio a de partiçelle microscopiche sollide, dîte nuclei de condensaçion.

Formaçion

E goççettiñe che costituiscian una nuvia gh'han in diametro ch'o va da quarche micron a quarche dexeña de micron; queste pœuan tuttavia aomentâ de dimenscioin, segge pe urteiô condensaçion de vapô aqueo segge pe coalescença con di âtre goççettiñe.

L'accrescimento pe condensaçion o l'è façilitao da-o fæto che, a man a man che o raggio da goçça o l'aomenta, a tenscion de vapô a diminuisce e l'è quindi suffixente un'umiditæ relativa via via menô pe fâ condensâ o vapô; l'accrescimento o vegne però limitao da-o calô de condensaçion, ch'o fa aomentâ a tempiatua de l'aia circostante e diminuî l'umiditæ relativa.

A coalescença a s'ha quande una goçça a l'ha razonto de dimenscioin maggioî de goççe circostante e quindi a mescia rispetto a queste, intrando façilmente in collixon con liatre e aggregandosie. A veloçitæ d'acrescimento de goççettiñe a dipende da-a quantitæ de vapô d'ægoa prezente, da-a tempiatua e da-a veloçitæ de rafreidamento de l'aia, da-a concentraçion di nuclei de condensaçion e da quella de goççettiñe mæxime. Quande o peizo de goççe o vegne maggiô da spinta ascenscionâ de l'aia, liatre cazzan formando e preçipitaçioin. O contegnúo d'ægoa de nuvie o varria inte di limmiti assæ vasti, ma o l'è sempre de l'orde de pochi grammi, ò sciña de meno, pe metro cubbo. Quande a tempiatua a chiña a-o de sotta de 0 °C se pœu formâ di crestalli de giaçça, in parte pe sublimaçion do vapô in gio a di nuclei de sublimaçion, ma sorvetutto pe conziamento de goççettiñe d'ægoa; questo segondo processo ascì, ch'o pâ êse o ciu frequente, o l'è favoiio da-a prezença de nuclei estrannei: in assença de questi, de fæto, e goççetiñe pœuan arestâ a-o stato liquido (sorvefuze) scin a de tempiatue de −15 °C e sciña minoî.

O rafreidamento de l'aia, ch'o provvoca a condensaçion do vapô d'ægoa, o pœu avegnî a caoza de varri procesci. Quello ciu importante l'è costituio da l'espanscion adiabatica de l'aia ummida inti so moti ascenscionæ; questi pœuan produise pe conveçion naturâ, dovua a l'instabilitæ de l'aia quande a diminuçion de tempiatua con l'âteçça a segge maggiô do gradiente adiabatico, ò pe scorimento ascendente de una massa d'aia cada sorve una massa d'aia freida (asceiza frontâ), ò pe ascendença orografica, dovua a di rilevi montooxi, ò, inti stræti ciu vexin a-o sœu, pe turbolença. Un âtro processo de raffreidamento, essençialmente no adiabatico, o l'è dovúo a-o contatto de l'aia co-o sœu ch'o se raffreida pe irraggiamento, ò a l'iraggiamento mæximo de l'aia. A condensaçion a pœu, ôtr'a ço, avegnî pe mescciua de masse d'aia a tempiatua e umiditæ despæge, con formaçion de una region de contatto inta quæ l'aia a vegne satura, opù pe l'aomento progrescivo d'umiditæ relativa dovúo a l'evapoaçion de superfiçie liquide ò ummide, umiditæ ch'a pœu êse trasportâ verso l'âto da-a turbolença. A segonda di procesci de condensaçion e de caratteristeghe dinamiche de l'atmosfea, se produxe de nuvie de aspetto e costituçion despægi.

Clascificaçion

Clascificaçion de nûvie

Da-o punto de vista dinamego e nuvie se pœuan clascificâ inte doe grende classe: e nuvie stratificæ e e nuvie convettive (ò cummoli). E nuvie stratificæ, avente un'estenscion orizzontâ conscidereive (sciña de çentanæa de km), son produte da di moti ascenscionæ lenti (veloçitæ verticâ de l'orde di cm/s), comme pœu avegnî, prez., int'o scuggiamento de masse d'aia cada sorve de masse freide; i cumoli, ch'han invece noteive estenscion verticâ, son produti da de corente convettive avente veloçitæ de l'orde de despægi metri a-o segondo, provocæ da 'n instabilitæ de l'atmosfea.

D'inte ste doe classe fondamentæ s'ha una gran varietæ de forme, e l'attoâ clascificaçion internaçionâ di tipi de nuvie, bazâ in sce quella proposta da Luke Howard into 19° sec., a l'è in realtæ una clascificaçion morfologica. A l'elenca 10 generi prinçipæ, di quæ 8, comprendenti e nuvie stratificæ, son sudivixi convençionalmente in nuvie âte (fra 6000 e 12.000 m de âteçça), nuvie meddie (fra 2000 e 6000 m) e nuvie basse (a-o de sotta de 2000 m), e 2 comprendan i cumoli. Tâ clascificaçion morfologica a pœu consciderâse ascì una clascificaçion fixica, in quante a forma de nuvie a l'è necessaiamente indicativa do particolâ stæto dinamego e termodinammego de l'atmosfea e di procesci che in questa han lœugo, sciben che un determinao genere de nuvie o pœu in realtæ avei origine inte di procesci diferenti.

Pe tegnî conto do gran numero de forme che e nuvie pœuan assumme, a clascificaçion internaçionâ a sudividde i varri genneri in specce e varietæ, con attribuii che ne rapprezentan e particolaritæ morfologiche.

Atri progetti

Contròllo de outoritæLCCN (ENsh85027191 · GND (DE4125270-6 · BNF (FRcb11952827m (data) · NDL (ENJA00566990