Ventemiglia (Vintimiggia in zenese, dìta ascì Vëntëmigl’ in brigascu, Ventimiglia in italian) l'è in cumün de 25.450 abitanti int'a Pruvinsa de Imperia.
Geugrafia
Sestéi
Ina vota i Sestéi i era numà int'e zone storiche d'a çità ma int'i ani çincanta pe mantegne a tradisiùn gan spartì tütta a çità cui nomi dei Sestéi antighi.
A çità l'è spartìa a sta manéira: U Sesté d'a Marina, duve gh'eira ina vota l'ünica zona d'u çentru storicu cu'u ma' liberu; U Sesté d'a Ciassa, che l'è u sesté d'u çentru storicu e che piglia u nome da a Ciassa d'a Geixa Granda e ragrüpa ascaixi tütu u çentru storico e ascaixi e frasiùn d'è Ture, Làite, Grimaldi, Mortola, Bevera, Varaxe, Carvu, Seglia e San Lurençu.
L'è u Sesté ciü populà d'a çità; U Sesté d'u Cuventu, che piglia u nome da u veciu cuventu d'i frai de Sant'Agustin che l'eira dopo d'u Röia e ancura ancöi gh'è a Geixa de Sant'Agustin; U Sesté d'u Campu, che ancöi (dapöi dei ani çincànta) l'è d'a fin de Via Roma fin'a fuxe d'u Nervia (int'a zona de Nervia) ma ina vota l'eira â çità auta, d'a fin de Corso Garibaldi fin â Geixa de San Miché; U Sesté de l' Auriveu, che u parte d'a Ciassa du Rexenté, duve cunfina cu'u sesté Cuventu, e va fin â Nervia, ae Logge (currispundente d'u Ma' d'a zona de çità de Porta de Pruvença), e in çità cunfina cu'u Cuventu d'a ciassa du comün fin au confin c'u Campu; e infin gh'è u Sesté d'u Burgu, che l'è u sesté che ina vota l'eira ciamàu Lagu, e u parte d'e scalinàe pe' muntà â çità auta, fin a Porta Marina (in zü), a Punente confina, pe' tüta a riva du Röia de çità, cu'u sesté Cuventu, ma a partir da San Segundu in sciü fin'a Porra e Trücu l'è tütu d'u sesté Burgu.
Frasiùe
E Frasiùe de Ventemiglia sun (divise a partì d'a Làite a Nervia):
- Cunfin cu'a França: Làite, Mortola, Grimaldi, Seaussa.
- Frasiùe de Muntagna (Val Röia e Bevera): Ture, Seglia, San Lorençu, Bevera, Carvu, Varaxe, Trüccu, Pure.
- Çentru Storicu (queste nu e sun frasiùe ma sempliçi divisiùe): Marina, Çità Auta, Burgu.
- Çità Muderna (cume pe' u çentru storicu): San Segundu, Çentru (tütu u çentru çitadin, cu'u comün e i palaxi ciü impurtanti), Longumà (d'a riva destra d'a fuxe d'u Röia), Nervia (d'a fin de Via Roma fin a fuxe d'u Nervia cu tüta a çità che gh'è drente e u burgu veciu de Nervia, prima de Campurüssu).
Cultüra
Ventemiglia, prima ciamà "Albion Intemelium" (çità-capitale d'i Ligüri Intemeli), ga maisci resti Ruman, da i scavi d'a çità antiga ae Ville de Làite. Dapöi ga u çentru storicu ciü grande d'a Ligüria, dopu chelu de Zena, e ascaixi tüte e frasiùe storiche gan çentri medievài maisce ben sarvài, surtù int'a Val Bevera, coi burghi de Bevera, Carvu e Ture.
Manifestasiùe
Tüti l'ani, int'u mésu de zügnu, se urganiza a Battaglia de Sciüre, üna d'è manifestasiun ciü impurtanti d'a çità.
Feste e fèire
A festa de San Segundu l'è u 26 de avustu, l'è a festa d'u patron de Ventemiglia desgüglià inta Geixa Granda de Ventemiglia (au matin). Int'u dopusdernà, gh'è a Processiun, unde ün grüpu de balestrei d'a Cumpagnia d'i Ventemigliusi porta l'Arbustu de San Segundu fin â Geixa Granda pe' riturnà dapöi â Geixa de San Segundu int'a sou ripa.
Cumünicasiùe
A çità a l'è servîa da 'na stasiun sciüa linia Zena-Ventemiglia.
Itàlia
Liguria
Imperia
.svg)
