 |
Quest articol chì l'è in la Vedrina de la Wikipedia |
|
 | |
|---|---|
| |
| Lign de la | metropolitana de Milan |
| Inaugurazion | 1969 |
| Ultima estension | 2011 |
| Gestor | ATM |
| Treni | Elettrotreni Leonardo Meneghin |
| Scartament | 1 435 mm |
| Trazion | 1 500 V CC (pantograf) |
| Stazion | 35 |
| Longhezza | 40,4 km |
| Distanza media in tra i stazion |
1154 m |
| |
La linia 2 a l'è vuna di lign de la metropolitana de Milan e la conliga la città da Nord Est a Sud, cont i capoligna a Cologn Nord e Gessaa a Nord Est e Assagh Milanofiori Forum e Biegrass a sud.
A l'è de solit ciamada linia verda e l'è la pussee longa e l'unega cont di tocch in superfiss.
La incrosa la linia 1 a Cadorna FN e Lorett, la linia 3 a Central FS e la linia 5 a Garibaldi FS.
Storia
[Modifega | modifica 'l sorgent]La prima tratta
[Modifega | modifica 'l sorgent]El 27 de settember 1969 a l'è verta la prima tratta in tra Goeubba e Caiazz. El 27 de april 1970 a l'è slongada per Central FS e 'l 12 de luj 1971 l'è completàda finna a Garibaldi FS.
A causa del ritard in la consegna di treni appòsta a hinn staa doperaa quej de la linia 1 adattaa in manera de podè circolà cont on pantograf pussee grand, inveci de quell de servizzi doperaa in deposit. La tension de la linia aerea a l'è sbassada a 750 Volt. El 8 de november 1971 riven i treni appòsta e donca la tension a l'è volzada a 1200 Volt, in comun cont i lign celer de l'Adda. In del 1972, cont la soppression del servizzi, a l'è volzaa al definitiv 1500 Volt.
La tratta extraurbana
[Modifega | modifica 'l sorgent]
In del 1968 a hinn staa inauguraa i lign celer de l'Adda, 'na tranvia extraurbana che la conligava Milan a Gorgonzoeula. Per on quaj ann i treni de la metropolitana e i tram hinn andaa in sui midemm binari, finna a che, in del 1972, el servizzi di lign celer a l'è staa soppress e la tratta de Goeubba a Gorgonzoeula a l'è stada integrada del tutt in la linia 2, menter i alter tratt a hinn staa sostituii di bus.
El slongament Garibaldi-Cadorna
[Modifega | modifica 'l sorgent]In del 1970 a l'è approvaa el progett per slongà la linia de Garibaldi a Cadorna, cont dò stazion intermedij. La stazion de Moscova a l'è stada la prima a vess scavada senza bus vert in la terra, menter Lanza a l'è stada scavada in dò cann separaa. L'incros cont la linia rossa, giamò programma in del 1964, el s'è rivelaa falaa e l'è staa adeguaa.
La tratta, longa circa 2'200 meter, a l'è stada verta el 3 de marz 1978.
La diramazion per Cològn
[Modifega | modifica 'l sorgent]Semper in del 1970 a l'è approvada 'na diramazion de Goeubba a Bettola de Cològn, giamò prevista in di lign celer. Per fermà minga la viabilità a l'è deciduu de fàlla in viadott. El tronch, longh 3'360 m, a l'è attivaa el 7 de giugn 1981 insemma a 'n noeuv deposit e a 'n parchegg de scambi cont la tangenzial.
I slongament Porta Genova, Ròmol e Gessaa
[Modifega | modifica 'l sorgent]In del 1978 scomincen i lavorà per menà la linia de Cadorna a Porta Genova FS: La tratta, longa circa 2 km, a l'è scavada a colonn sovrapognuu per ciappà esperienza per la linia 3 e l'è stada inaugurada el 30 de ottober 1983.
El 13 de april 1985 a l'è inauguraa el tratt de Gorgonzoeula a Gessaa. In del midemm dì a l'è inauguraa el tratt de Porta Genova a Romol, scominciaa in del 1980 e longh 980 meter.
El slongament per Famagosta e Biegrass e la diramazion per Assagh
[Modifega | modifica 'l sorgent]
El 1 de november del 1994 a l'è attivaa el noeuv capoligna de Famagosta, in occasion di 30 agn de la metropolitana. In del 2005 a l'è slongaa finna a Piazza Biegrass.
El 20 de fevree del 2011 a l'è inaugrada, in superfis, 'na diramazion per Assagh, parallela a l'autostrada per Genova.
I lavorà per impermeabilizzà e i propòst de slongament
[Modifega | modifica 'l sorgent]La tratta in tra Lorett e Lambraa a l'è famosa per i sò problema de aqua, degià che l'è in su 'na aves: In del 2019 gh'hinn staa 'n mugg de lavorà per provà a miôrà la situazion, tant che la tratta a l'è stada sospenduda per tutt l'agost 2019. I lavorà hinn staa giamò preparaa in notturna del giugn e de luj, cont on taj de la frequenza, e anca a settember, cont el binari unich in tra Caiazz e Lambraa per mità mes.
Semper in tra el 2018 e 'l 2019 la gh'è stada 'na sospension notturna de la tratta in tra Goeubba e Gessaa per di reson de linia aerea.
A l'è stada insubida 'na noeuva tratta de Assagh a Binasch, ma l'è mai stada analizzada seriament.
Caratteristegh tecnegh
[Modifega | modifica 'l sorgent]La linia a l'è a scartament standard e cont trazion a 1,5 kV in correnta continova che l'è dada de 'na linia aerea. El segnalament ferroviari a l'è de tipo classich, a blocch automàtich e de velocità. Per el 2024 el gh'avaria de vess sostituii cont on sistema a blocch mobil.
Riferiment
[Modifega | modifica 'l sorgent]- M2 interrotta tutta agosto tra Udine e Loreto
- Lavori linea Verde Atm M2 | Informazioni e orari, bus sostitutivi
- Treni ogni 16 minuti e capolinea "anticipati": disagi in arrivo sulla metro verde M2 a Milano
Bibliografia
[Modifega | modifica 'l sorgent]- Giorgio Meregalli, Gli impianti ferroviari della linea 2 della Metropolitana di Milano, in Ingegneria Ferroviaria, maggio 1971, pp. 469-492, ISSN 0020-0956.
- Giovanni Cornolò, Fuori porta in tram. Le Tranvie extraurbane milanesi 1876-1980, Parma, Ermanno Albertelli Editore, 1980.
- Giuseppe Severi e Roberto Vasini, Metropolitana a Milano, Milano, Azienda Trasporti Municipali, 1989. no
- Erberto Botti, La progettazione e la costruzione delle infrastrutture civili, in Ingegneria Ferroviaria, novembre 1995, pp. 892-924, ISSN 0020-0956.
- Sergio Beltrame, Sviluppo della rete intermodale di pubblico trasporto al servizio dell'area urbanizzata, in Ingegneria Ferroviaria, novembre 1995, pp. 978-1000, ISSN 0020-0956.