Presciantenee (Precentenaro o Prato Centenaro in Italian) l'è on quarter de Milan, che 'l se troeuva in del Municipi 9 (insema a Affer, Porta Noeuva, Ninguarda, la Bovisa e i dintorna de vial Fulvio Testi), a nord-ovest del center.
El borgh, che 'l se troeuva arent al Seves, l'è bell antigh: l'è nominaa per la primma volta in d'on document del 1078, oltra che in del liber del Goffred de Busser Notitiae Sanctorum Mediolani (1346).
L'è staa on comun indipendent per on bell poo, che al temp di piev el partegniva a la Piev de Bruzzan.
L'è staa taccaa sotta Napoleon a Milan (1808-1816); poeu, duranta el Regn Lombard-Venet, in del 1841 l'è staa unii a Segnan, che 'l saria vegnuu ona frazion de Grech e poeu, in del 1923, on quarter de Milan.
De quell moment, Presciantenee l'è staa interessaa del desvilupp de la periferia industrial milanesa. Al dì d'incoeu el resta nagott de quell che l'era el vegg borgh.