Gurun Suriah (bahaso Arab: بادية الشام, bādiyat ash-shām) disabuik juo sabagai Hamad,[1] adolah kombinasi stepa jo gurun pasia sejati nan mancakup 500,000 kilometer persegis (200,000 mil persegis) Timur Tangah, maliputi bagian tenggara Suriah, timur laut Yordania, utara Arab Saudi, jo bagian barat Irak. Di subalah selatan babatehan sarato manyatu jo Gurun Arab.[2] Mampunyoi tanah nan tabantang laweh, pamukaan gurun ko panuah batuan baukuran ketek jo gadang, sasekali diselingi dek tumbuahan wadi.[3][4]
Namo Shamiyah digunoan pulo untuak panamoan Gurun Suriah ko.[5] Gurun ko dibatehi dek Lembah Orontes jo lapangan vulkanik Harrat al-Shamah di subalah barat, jo dek Efrat di subalah timur. Di utara, gurun pasir digantian dek daerah rumpuik nan labiah subur, jo di selatan batamu jo gurun pasia Samananjuang Arab selatan.[3]
Gurun Suriah adolah tampek habitat asli dek binantang hamster Suriah.[6] Bangau, kuntul, bangau crane, buruang-buruang ketek, unggeh aia, sarato pulo buruang pamangsa mengunjungi danau musiman nan tadapek di gurunko katiko tibo musim hujan. Mancik ketek adolah binantang nan banyak tadapek disiko, baitu pilo jo predatornyo sarupo ula, kalajengking, jo laba-laba unto; sabalumnyo nan banyak tadapek disiko adolah ruso, serigala, serigala jackal, rubah, kuciang, jo karakal, salain itu ado pulo buruang unto, cheetah, hartebeest (antelop afrika), jo onager (keledai lia asia). Mamalia-mamalian nan gadang ko kiniko indak dapek lai ditamuan, karano paburuan nan dilakuan dek manusia.[3][5]
Kadaan daerah gurun nan kurang curah hujan sarato kondisi kasuburan tanah nan buruak, kawasan gurun suriah ko dipagunoan dek masyarakaik satempek untuak mangambalo taranak sarupo unto jo domba. Para pangambalo taranak ko mangambalo sacaro bapindah-pindah dari sisi gurun nan ciek ka sisi gurun lainnyo. Pado tahun 1995, pamarintah suriah mamulai marevitalisasi sajuta hektar lahan nan kamudian mambatehi urang untuak mangambalo taranak. Di sekitar tahun 2000-an tadapek proyek pamarintah untuak mananam tumbuahan nan diparuntuakan untuak makan binatang taranak. Babarapo bagian dari gurun tasabuik ditanami tumbuahan. Hasilnyo sukses gadang, para pangambalo taranak tadi malaporan bahwasanyo produktivitas dari hewan taranaknyo maningkek.[7]