Kasopanan adolah bagian dari kode etik Wikipedia jo salah satu dari limo tonggak Wikipedia. Kabijakan kasopanan ko marupoan standar parilaku nan manantuan baa aruihnyo para panyuntiang Wikipedia saliang baubuangan. Sadaranonyo, panyuntiang aruih salalu mampalakuan satu samo lain dengan panuah patimbangan jo raso oromaik. Supayo dapek tatap bafokus pado paningkekan kualitas ensiklopedia sarato mambantu mamaliaro lingkuangan panyuntiangan nan manyanangan, panyuntiang aruih manjago sikap nan patuik, sopan, jo tanang, walau sadang badebaik sangik.
Kabijakan ko manjalehan standar-standar parilaku nan diarokan dari pangguno kutiko mareka saliang baubuangan, jo caro-caro nan tapek untuak manangani masaalah-masaalah nan mungkin muncua. Iko balaku untuak sadonyo panyuntiang jo ubuangan nan ado di Wikipedia, tamasuak pado laman maota pangguno, laman rundiang artikel, ikhtisar suntiangan, sarato dalam ota lainnyo basamo-samo atau tantang sasamo Wikipediawan.
Pabedoan pandapek indak tainda dalam sabuah proyek karajosamo. Kutiko mambahas pabedoan-pabedoan ko babarapo panyuntiang dapek talihek talalu kareh, sungguahpun mareka anyo mancubo untuak bataruih tarang. Panyuntiang lain mungkin nampak talalu sensitif kutiko pandangan mareka ditantang. Kata-kato bisu nan indak nampak wajah di laman pambicaroan jo ikhtisar suntiangan ko, indak samparono dalam mangiriman nuansa pacakapan lisan, nan kadang-kadang dapek manyabaukan salah tapsia ateh komentar surang panyuntiang.
Sabuah panyatoan nan indak sopan dapek maubah diskusi nan basumangaik jadi debaik paribadi nan manyimpang dari fokus obyektif masaalah nan ado. Debaik-debaik sarupo ko mambuek sia-sia sajo usao awak, sarato marusak lingkuangan karajo nan positif dan produktif.