Erasmus Reinhold (* 22. Oktober 1511 in Saalfeld/Saale; † 19. Februar 1553 ok dor) weer en düütsch Astronom un Mathematiker. He is en vun de eerst Verfechter vun dat kopernikaansch Weltbild un hett de wieder entwickelt. He kann dorum as Binnenlidd tüschen Kopernikus un Kepler ansehn wurr.
Reinhold wurr siet dat Wintersemester 1530/31 an de Universität Wittenbarg utbildt un wurr dor ok Rektor. 1535 wurr he Magister vun de söben free Künste un an' 30. April 1536 funn he Upnahm in den Senat vun de philosophischen Fakultät. 1536 kreeg he dor en Professur för höhgere Mathematik vun Philipp Melanchthon, ähnlich as Rheticus. Reinhold en groot Tall vun Steerns identifizeert un beschreven, hett sück aber ok an de organisatorisch Upgaven vun de Hoochschool bedeeligt. So weer he in dat Wintersemester 1540/41, as ok in dat Sömmersemester 1549 Dekan vun de philosophisch Fakultät un wurr in dat Wintersemester WS 1549/50 Rektor vun de Alma Mater.
He hett moderat pragmatisch de Lehren vun Nikolaus Kopernikus bruukt. Vun Hartog Albrecht von Brandenburg-Ansbach wurr he ünnerstütt, de den Druck vun de Preußisch Tafeln betallt hett, woher de ehrn Naam kreegen. Disse astronomisch Tafeln weern en Hülp för dat kopernikaansch System in dat ganze Düütsch Riek un doröver herut bekannt to maken. Reinhold weer för sien nau Meetwerte bekannt. Betekend is, dat Tycho Brahe so düchtig an Reinhold sien Meeten interesseert weer, dat de sülvst de Reis nah Saalfeld to Reinhold antreden is.
1582 wurrn de Bereken vun Kopernikus un de Preußisch Tafeln to Grundlaag för de Gregoriaansche Klennerreform bruukt.
De Maandkrater Reinhold is nah hüm nömmt. In sien Heimatstadt Saalfeld sünd en Gymnasium un en Straat nah hüm nömmt.