Georg Droste (* 13. Dezember 1866 in Bremen; † 17. August 1935 ook dor) weer en plattdüütschen Verteller ut Bremen.
Droste sien Vadder weer Sniedermeester. He hett een povere Kinnertiet un Jöögd verleevt, man dat geev doch jummers wat to lachen. Upwussen is he an'n Oosterdiek an'e Werser. Bi'n Bookhöker hett he as een Jung arbeit, later hett he een Lehr bi een Wullfirma maakt. 1886 is he blind wurrn un hett as Höker up'e Straten arbeit. Denn is he nah Hannober gahn un hett Korfmakeree lehrt. 1893 hett he heiraat. Mit'e Tiet hett he dor wat vun maakt, dat he plattdüütsche Geschichten vertellen konn. 1908 keem sien eerst Book Achtern Diek in'n Druck. Vun dor af an hett he denn mit Hölp vun een Schrievmaschien för Blinnen fudder Vertellen schreven. Vun 1913 af an sund de Ottjen-Alldag-Böker rutkamen. De harrn ganz veel mit sien egen Geschicht un sien egen Leben to kriegen. Mit de Tiet höll he denn ok Vordrääg un nah den Eersten Weltkrieg konn he de Korfmakeree upgeven un leev vun dat Schrieven. Siene Bökers weert jümmers noch upleggt un verköfft.