Hans Much (* 24. März 1880 in Zechlin; † 28. November 1932 in Hamborg) weer en düütschen Mediziner un Schriever.
Hans Much studeer in Marborg, Kiel, Berlin un Würzborg op Medizin un möök 1903 sien Dokter. Vun 1905 af an dee he en Afdeel an’t hygiensche Institut in Marborg leiden un weer vun 1908 af an Oberarzt an’t Krankenhuus in Eppendörp (wat hüüt dat Universitätsklinikum Hamborg-Eppendörp is) in Hamborg ünner Hermann Lenhartz. Den sien Dochter Marie dee he 1912 heiraden. Vun 1913 af an weer Much Baas vun dat Institut för Tuberkuloseforschung in Hamborg. He möök dorbi denn 1913/1914 ok Forschungsreisen na Jerusalem un Kleenasien. As de Eerste Weltkrieg utbreken dee, dor keem he in Ägypten in en Lager un arbeidt, nadem he freekamen weer, in’n Militärsanitätsdeenst. 1919 is Much denn Perfessor Extraordinarius för Hygiene an de ne’e Universität Hamborg un Baas vun dat seroloogsche Institut worrn. 1921 wörr he denn ornlicher Perfesser.
Blangen de Arbeit as Dokter hett Much sik mit Architektuur un Kunstgeschicht beschäftigt un ok mit östliche Religionen, besünners den Buddhismus. He hett över Medizin schreven, plattdüütsche Gedichten maakt un Böker to de noorddüütsche Backsteengotik, Heimatkunst, Buddhismus un Islam rutbröcht.
Much is 1932 doodbleven un liggt in Nottensdörp begraven.