John Francis Clauser (* 1. Dezember 1942 in Pasadena, Kalifornien)[1] is en US-amerikaansch Experimentalphysiker, de sück mit Grundlagen vun de Quantenmechanik befaat. In dat Johr 2022 wurr hüm de Nobelpries för Physik gemeensam mit Alain Aspect un Anton Zeilinger för den Nahwies, dat Korrelatschonen tüschen Quantenobjekten starker ween könnt as de Bell-Unglieken erloovt un de dordör mögelken Experimente mit verschränkten Photonen un de Grundlagen vun de Quanteninformatschoon, tospraken.[2]
Clauser is de Söhn vun en Perfesser för Floogtüüchbau (Francis Hettinger Clauser, 1913–2013) an dat Caltech un hett an dat Caltech (Bachelor 1964) un an de Columbia University studeert, wo he 1966 sien Master-Afsluss maakt un 1969 bi Patrick Thaddeus över dat Meeten vun den Kosmischen Mikrowellenhintergrund sien Doktertitel maakt hett. Dornah weer he bit 1975 an dat Lawrence Berkeley National Laboratory un 1975 bit 1986 an dat Lawrence Livermore National Laboratory. Ansluutend weer he as Forschungsphysiker an de University of California, Berkeley.
In en grundleggend Experiment hett he mit Stuart Jay Freedman[3] de Bellsche Unglieken test, de se tovör to de CHSH-Unglieken (Clauser, Michael Horne, Abner Eliezer Shimony un Richard Holt 1969) verallgemeenert harrn.[4] Dat weer de eerste Beobachtung vun en Quantenverschränkung un dat eerste Experiment, dat de Verletzung vun de Bell-Unglieken wies (un dormit de Quantenmechanik bestätigen dee). Dornah hett he sück mit Atom-Interferometern befaat.
He hett sück ok mit den Insluss vun Plasmen mit magnetischen Spegeln (Magnetisch Buddel) befaat.
2010 kreeg he mit Alain Aspect un Anton Zeilinger den Wolf-Pries in Physik, un 2022 ebenfalls gemeensam mit disse beid Forschern den Nobelpries för Physik.