Dat Wapen vun den SV Werder Bremen, de bekannte Werder-Ruut
Werder Bremen vun 1899 is en Sportvereen ut Bremen. Grünnt wurrn is he an’n 4. Februar1899. Dor warrt in 7 Afdelen Sport bedreven. De Vereen besteiht ut den Sportvereen Werder Bremen vun 1899 e.V., de för den Amateursport tostännig is, un de Werder Bremen GmbH & KG a.A. (up Aktien), de an’n 27. Mai2003 grünnt wurrn is. Düsse GmbH kümmert sik um den Profisport. De SV Werder Bremen warrt vun Klaus Dieter Fischer as Präsidenten anföhrt un de Sportdirektor heet Klaus Allofs. Geschäftsföhrer is Jürgen Ludger Born. De Trainer vun de Footballmannschafft heet Ole Werner. De SV Werder is al veermol düütsche Meister in de Bundsliga wurrn: 1965, 1988, 1993 un 2004. In dat Johr 2004 hefft se dat „Dubbel“ hoolt, dat bedutt: Se sünd nich bloß Meister wurrn, man hefft ok den Düütschen Football-Pokal wunnen. 1992 hett de Vereen den Europa-Pokal vun de Pokalwinners hoolt. In de Johren 2005 un 2006 hett Werder bi de Champions-League mitspeelt un hett dat beide Molen bit in dat Achtelfinool schafft. 2008 hett sik de Vereen to’n föfften Mol achternanner qualifizeert för de Königsklass vun Europa, un, na een Paus vun bloß een Johr, is de Ploog 2010 wedder dor mit bi. Werder is een vun de besten 20 Footballteams in Europa. De Vereen hett um un bi 20.000 Maten. Tohuus speelt de Vereen in dat „Werser-Stadion“. Dor paßt so um un bi 43.000 Lüde rin.
Dat Werserstadion vun Südwesten her bekeken, in’n September 2005.
An’n 28. August2008 sünd de Gruppen-Spelen för de Champions-League utloost wurrn. De SV Werder Bremen hett in Pott 2 steken. Dor sünd de Mannschoppen in, de to de tweetbeste vun veer Gruppen tohören doot. Werder weer dor tohopen mit AS Rom, Sporting Lissabon, PSV Eindhoven, Villareal, Bayern München, den FC Porto un Juventus Turin. För Werder is nu düsse Grupp utloost wurrn (Grupp B): Inter Mailand, Werder Bremen, Panathinaikos Athen un Anorthosis Famagusta. Allgemeen warrt seggt: Dat is en Grupp, wo dat mööglich ween schall, dat Achtelfinaal to schaffen. De Speelterminen för Werder sünd (In Klammern, wat rutkamen is): Dingsdag, 16. September: Werder-Famagusta (0:0). Middeweken, 1. Oktober: Inter Mailand- Werder (1:1). Middeweken, 22. Oktober: Panathinaikos- Werder (2:2). Dingsdag, 4. November: Werder- Panathinaikos (0:3). Middeweken, 26. November: Famagusta- Werder (2:2). Dingsdag, 9. Dezember: Werder- Inter Mailand (2:1). Dor weer Werder Drüdde in'e Tabell mit un möss ut de Champions-League utscheden. Man na de Winterpaus güng dat denn mit den UEFA-Cup wieter. Dor hett Werder eerst mol gegen den AC Mailand speelt. Tohuse in't Werserstadion hett dat en 1:1 geven. Un buten in Mailand hett Werder en 2:2 schafft. So is Mailand denn utscheedt un Werder hett sik dörsett un speel nu in't Achtelfinale gegen den franzööschen Vereen AS St. Etienne. Dor hett Werder dat ok schafft un weer in't ´Viddelfinale gegen Udinese Calcio. Gegen de Italieners hett Werder tohuse 3:1 wunnen un in Udine 3:3 speelt. Nu güng dat in't Halffinale gegen den Hamborger SV. Dor hett Werder dat Speel tohuse mit 0:1 verloren, man dat Trüggspeel in Hamborg denn mit 3:2 wunnen. Nu stünn Werder an'n 10. Mai in Istanbul in dat Finale vun den UEFA-Cup gegen Schachtjor Donezk. Düt Speel hett Werder mit 1:2 verloren.
DFB-Pokal
De SV Werder Bremen hett in de Speeltied 2008/2009 den DfB-Pokal wunnen. An'n 31. Mai güng dat in Berlin gegen Bayer 04 Leverkusen. Dat Speel hett Werder mit 1:0 wunnen. Dat Door för Werder hett Mesut Özil in de 58. Min. schaten. Bit dorhen hett Werder bloß utwärts spelen mösst, man all Spelen wunnen. In't Halffinale hett dat bi den Hamborger SV na Verlängerung en Ölbenmeterscheten geven. Dor hett Tim Wiese dree Ölbenmeters holen un Werder is wieterkamen. In't Viddelfinaal harr Werder vördem utwärts bi den VfL Wulfsborg spelen mösst. De beiden eersten Doorhöders vun Werder kunnen nich antreden, dor hett de Mannschop mit den drüdden Doorhöder Pellatz 5:2 in Wulfsborg wunnen.
.svg){kind=small}
.jpg)
.jpg)
