Stanley William Turrentine [[ˈtʌɺəntiːn]] (* 5. April 1934 in Pittsburgh, Pennsylvania; † 12. September 2000 in New York) weer en US-amerikaansch Jazzsaxophonist.
In Pittsburgh boren, speel Stanley Turrentine mit darteihn Johren Tenorsaxophon un wurr 1951 Berofsmusiker. He fung sien Loopbahn in Blues- un Rhythm-and-Blues-Bands an un wurr vun Illinois Jacquet bedüüdend beinfloot. In de 1950er-Johren speel he in Bands vun Lowell Fulson, Earl Bostic, Tadd Dameron un Max Roach. 1956 bit 1958 weer he vun de US Army intrucken. 1959/60 hett Turrentine bi Max Roach arbeit. To disse Tiet speel he in de Traditschoon vun Ben Webster, aber ok Sonny Rollins harr up hüm Infloot. Sien Stil teken sück ut dör en utpräägt Melodiösität un en bannig geschmeidig Phrasieeren up dat Saxophon.
Siet he 1960 de Organistin Shirley Scott heiraten dee, speel he regelmatig mit hör. In de 1960er-Johren nehm he tallriek Schallplatten in' Stil vun den Soul Jazz för dat Label Blue Note up, dorünner völ Upnahmen mit den Organisten Jimmy Smith. In de 1970er-Johren hett he, den Tietsmack folgend, sien stilistisch Spektrum utwiet un nehm för dat Label CTI eenige vun de Kritik lobt un för en Jazzmusiker kommerziell ungewöhnlich spoodriek Fusion-Alben up, ünner annern ok mit Eumir Deodato. In de 1980er- un 1990er-Johren hett he sück aber weer traditschonelleren Speelwiesen towend.
Sien Bröer weer de Trompeter Tommy Turrentine.
He is an' 12. September 2000 an en Slaganfall storven un wurr in Pittsburgh begraven.