Robertico Rosendo (Tico) Croes (☆ 28 di november 1955 na Aruba) ta un poeta, academico y ex-politico Arubano.[1] Den gabinete Henny Eman III e tabata minister di Finansa di Aruba di 17 di juni 1998 te 30 di october 2001 y alabes vicepremier desde 2000. Previamente e tabata minister di Asuntonan Economico y Turismo di 1994 te 1998.
Tico Croes a lanta na Santa Cruz como yiu mayor di famia Croes-Lee. E tin tres ruman homber y un ruman muhe. Despues di caba VWO na Colegio Arubano Croes a studia ciencia politico na universidad di Bogota, Colombia. Na 1983 el a continua su estudio na University of Southern California, unda e ta obtene su maestria den “International Political Decision-Making”. Na 2000 el a doctora den economia aplica na Universidad Twente na Hulanda cu e disertacion Autonomy of Demand in International Tourism: The Case of Aruba.
Croes a cuminsa su carera na 1980 na gobierno, den departamento di Relacionnan Exterior di Aruba (DBB) y a wordo nombra director na 1986. Na 2002, despues di mas cu diestres aña den politica activo, e ta bay traha na University of Central Florida (UCF) na Orlando (Florida). Desde 2012 e ta nombra den funcion di profesor di Rosen College of Hospitality Management. Croes ta autor di varios buki y articulo cientifico y como director adhunto di "Dick Pope Sr. Institute for Tourism Studies" a encabesa diferente estudio tocante e desaroyo y impacto di turismo riba e islanan di Caribe Hulandes y na multiple pais rond mundo.
Croes ta casa cu Suzette Beaujon.
Durante su estudio el a debuta bou di e pseudonimo "Ticoli" cu su prome coleccion di poesia Alma Sangra na 1977.[2] Seguidamente algun di su poemanan a wordo publica den e antologia "Cosecha Arubiano", un publicacion di Cas di Cultura na 1983. Casi binti aña despues su di dos coleccion di poesia bou di titulo Potret di un cara desconoci ta mira lus. Den su poemanan e pensamentonan di consciencia ta parecido na esunnan di poeta Henry Habibe, for di kende Croes a haya les di Spaño na Colegio Arubano.
Tico Croes a postula su mes como kandidato riba lista di AVP pa eleccion di parlamento di Aruba na 1989.[3] Entre 1989 y 1994 e tabata parlamentario den oposicion. Durante gabinete Henny Eman II e ta fungi como minister di Asuntonan Economico y Turismo di 1994 te 1998; sigui pa minister di Finansa durante gabinete Henny Eman III. Na 1999 a ta wordo elegi lider di partido como sucesor di Henny Eman.[4] Despues di resultadonan electoral negativo na 2001 Croes ta retira como lider di partido y ta bandona politica Arubano.
Fuente, nota i/òf referensia
|