Wappe | Daitschlandkard | |
---|---|---|
| ||
Basisdate | ||
Bunnesland: | Hesse | |
Regierungsbezirk: | Damstadt | |
Krääs: | Ourewaldkreis | |
Heche: | 175 m ü. NHN | |
Fleche: | 23,2 km² | |
Aiwohner: | 5047 (30.06.2019) | |
Bevelkerungsdicht: | 218 Eiwohner je km² | |
Boschtläätzahl: | 64395 | |
Voawahl: | 06161 | |
Kfz-Kennzääche: | ERB | |
Gmäändschlüssel: | 06 4 37 003 | |
Gemeindegliderig: | 6 Ordsdeile | |
Adress vun de Gemeindevawaltung: |
Ezyer Straße 5 64395 Brensbach | |
Websait: | ||
Berjameischder: | Rainer Müller (SPD) | |
Laach vun de Gemeinde Bräischboch im Ourewaldkreis | ||
Bräischboch is e Gemeinde im Ourewald mid rund 5000 Åiwuhner uf ere Fläsch vun 23 km² un ghert zum Ourewaldkreis in Hesse. Bräischboch ligd im nerdlische Vordere Ourewald, im Gerschbrenzdal.
Bräischboch beschdeht aus de sechs Orde[1] Affhellerboch[2] (mid Kilschboch), Bräischboch (mid Mummeroud[2]), Hellerboch, Koischboch (mid Stierboch), Walwich un Wersche (mid Bierboch un Hibbelschboch[2]).
Bräischboch is in da erschde Hälft vum 13. Jahunnad als Brendisbach zum erschdemol schrifdlisch erwähnt worre. Im Zug vun da Hessische Gebiedsreform is 1971 di Gemeinde Affhellerboch noch Koischboch oigemeindt worre. 1972 sin fimpf selbschdännische Gemeinde, Bräischboch, Hellerboch, Koischboch, Walwich, Wersche zur neie Gemeinde Bräischboch zammegschlosse worre. Gleischzeidisch sin se aus-em Landkreis Dibborg zum Ourewaldkreis kumme.
In da Gemeinde Bräischboch gibt-s zwee Grundschule, drei Kinnerschule un ää Waldkinnerschul, zwee Bischareie, zwee Heimatmuseë, e Kunschtgalerie un e Theader. Pattnergemeinde is Ezy-sur-Eure in da Normandie, Frånggreisch.
Ort | Affhellerboch | Bräischboch | Hellerboch | Koischboch | Walwich | Wersche | zamme |
Åiwuhner 2019[3] | 212 | 2.130 | 361 | 730 | 293 | 1.321 | 5.047 |
Fläsch (Hegda)[4] | 327 | 592 | 205 | 226 | 351 | 568 | 2.320 |
Heh (m i. NHN) | 240 | 178 | 255 | 185 | 244 | 173 | – |
Di Gemaagung reischt vun 175 bis 385 m Heh. 53 % vun da Gemaagungsfläsch sin landwerdschafdlisch genutzt un 28 % sin Wald[5].
Da Dialegd vun Bräischboch un soine Derfer ghert zum Sidhessische Ourewällerische, wu im Ourewald Rischdung Side allmählisch ins Kurpälzische Ourewällerische iwwergeht. In Bräischboch sescht ma Kerb (sidhessisch) un is am Iwwergång vun Fest (sidhessisch) zu Fescht (kurpälzisch).
Offizielle Nåme im Dialegd sin: Kerbborsche Bräischboch (Veroi), De Laabfrosch (Kinnerschul)
Affhellerboch liggt am Owwerlauf vun da Affhellerbach. 1450 werd-s unnerm Name Effolderbach s erschdemol erwähnt. Da Name kummt vun Affolder, e aldes Word fä Abbelbååm. 1757 heeßt-s Affhölerbach.
Uf da Gemaagung liggt di Burgruin Schnellerts aus-em friehe 13. Jahunnad, wu mid da Saag vum Wilde Heer un em Rooreschdååner (em Schnellertsgeischt) verbunne is. Aa di Pennsilfaanisch Deitsche kenne en "Schneller Geischt" (uff Englisch Snallygaster), wu allerdings dort inzwische ganz annerschder aussieht.
Da ehemolische Leschwasserdeisch is vun de Åiwuhner zumne Freibad umgschdalded worre. In Affhellerboch gibt-s e Kinnerschul. Kerb werd am zwedde Wocheend im Juli gfeierd.
Bräischboch liggt im Gerschbrenzdal. Am Pa-Agger in Bräischboch sin Schlachdreschde vum-ne Wollnashorn aus da Aldschdååzeit gfunne worre. Im Nochdrag vum Codex Eberhard, ere udadierde Urkund, wu Hischdoriker in di erschd Hälft vum 13. Jahunnad schdelle, liest ma s erschdemol vun Brendisbach. In Bräischboch is die Verwaldung vun da Gemeinde, s Gemeindezendrum mid-ere Schbord- un Kuldurhall, e Theader, e Bischarei, e Kinnerschul un e Grundschul.
Di godisch evangelisch Pakäjsch Sånggd Majkus schdammd aus em 16. Jahunnad. Im Alde Schul- un Rothaus is des Schnellerts- un Heimat-Museum.
In Bräischboch is am erschde Sunndag im Juli Brinnchesfest im Hinnerwald, am erschde Wocheend beziehungsweis am erschde Mundag im Sebdember Kerb un am zwedde Advent Wåihnachtsmaagd.
Hellerboch liggt im Dal vun da Hollerbach. Da Ordsname erscheint 1408 s erschdemol, als Holderbach, kummt also vum Holler.
Hellerboch feiert soi Kerb am ledschde Wocheend im Auguschd.
Koischboch liggt an da Mindung vun da Koischbach in di Gerschbrenz. Da Name Cuningesbach daucht 1012 uff, ma weeß awwer net, ob sich-s um di Bach odder schun um in Ord handelt. Da erschde sischere Nochweis vum Ord schdammd, wie bei Bräischboch, aus-em Codex Eberhardaus in da erschde Hälft vum 13. Jahunnad.
Koischboch hot e Kinnerschul. Immer am 1. Mai is e Oldtimer-Dreffe. In Koischboch werd di Kerb am ledschde Wocheend im Auguschd gfeiert.
Walwich liggt am Owwerlauf vun da Bräischbach. Walwich is 1426 als Walbach s erschdemol erwähnt worre. 1770 hots in Walwich e Silwerbergwerk gewwe.
In Walwich is im Mai des Ourewäller Bergturnfest un am ledschde Wocheend im Sebdember di Kerb.
Wersche liggt am lingge Ufer vun da Gerschbrenz. Di äldeschde ajschologische Funde aus Wersche sin Schdååbeile aus da Jungschdååzeit. Bei Wersche Schdeht en Hingglschdåå. Unnerm Chor vun da Bergkäjsch ausgegrawene Ziggl weise e rämische Siedlung noch. Der Ord is 1314 s erschdemol als Wersauwe erwähnt worre (1492 Wersau, 1602 Wersen). Da Weiler Bierboch daucht 1314 in schrifdlische Quelle uf. Da Weiler Hibbelschboch is erschd 1764 endschdanne.
Uffem Käjscheberg odder Paberg waa e middelalderlische Wehrålag. Do schdeht heit e frihgodischi Kabell, wu paamol umgebaut worre is. Da Käjscheturm ausem Johr 1631 schdeht vum Gebaide gedrennt un is gleischzeidisch en Dorturm.
Wersche hot e Dorfmuseum zur Gschischt vum Ort. Wu heit da Gänsbrunne steht, waa schun frieher en Brunne un di Millischsammelschdell. Doher heeßt ma de Brunne aa Schebbrunne un Milschkisch (Orginalausdrigg im Dialegd). Wersche hot e Grundschul un e Kinnerschul. Wersche feierd am Pingschdmundag e Waldfescht, am erschde Wocheend im Auguscht e Schdroßefeschd un am dridde Wocheend im Sebdember di Kerb.
Braibäisch | Bräischboch | Bromischdal | Crumboch | Erboch | Heigscht | Kinnich | Litzelboch | Mischelschdadt | Mossaudal | Owwerzent | Reigels |