logudoresu · LSC · nugoresu
Patrick George Zaki est unu studianti apusti-làurea egitzianu de s'Universidadi de Bologna, Itàlia, chi est presoneri me in Egitu de su 7 friaxu 2020.[1] Zaki est studiendi po unu Master Erasmus Mundus in stùdius feminilis e de gèniri in s'Universidadi de Bologna. Fait fintzas circa e patrocìniu legali po problemas de gèniri e deretus umanus po s'Atzioni egitziana po is Deretus Personalis, un'organizatzioni po is deretus umanus cun basi in Cairo.[2]
A Zaki dd'ant arrestau a s'arribu a s'arioportu internatzionali de Cairo candu fiat furriendi a domu de Bologna po una vìsita a sa famìlia. S'Agentzia Natzionali po sa Seguràntzia Egitziana at comunicau de dd'ai arrestau, interrogau in contu de su tempus suu in Itàlia e su traballu suu apitzus de is deretus umanus e bitiu in unu logu disconnotu.[1] Dd'ant detènniu incurpendi-ddu de “spraxi noas farsas” e “impunciai a sa protesta”.[3] Segundu s'abogau suu, is agentis de s'Agentzia Natzionali po sa Seguràntzia dd'ant lassau bendau e postu in musas in totu is 17 oras de interrogu me in s'arioportu e apustis in unu logu disconnotu me in Mansoura. In s'interis de s'interrogu, fiat amenatzau a fitianu, scutu a stògumu e a schina e torturau cun scàrrigas elètricas.[3]
Su 8 de friaxu 2020, a Zaki dd'ant bitiu a s'ofìtziu de su ministèriu pùblicu, chi at cumandau s'arrestu suu po 15 diis, abetendi is imbistigus[3] apitzus de is acusas de difusioni de noas farsas e organizatzioni de protestas no autorizadas.[4] Su procuradori capu at negau is acusas de tortura a banda de sa politzia.[5] Su 10 de martzu 2020, is autoridadis egitzianas ant tasiu is vìsitas a sa presoni po firmai sa spraxidura de sa maladia COVID-19, ma no ant organizau perunu mèdiu alternativu de comunicatzioni intra is famìlias e is presoneris comenti cumandat sa lei egitziana.[6] Zaki sunfrit de ana e duncas arriscat meda chi si est aparau a su COVID-19 in sa presoni de Tora. Su 5 de maju 2020, is procuradoris supremus de stadu ant arrenoau sa presonia sua po àterus 15 diis chena Zaki o s'abogau suu presentis. Is autoridadis de sa presoni no funt arrennèscius a ddu tramudai achè is procuradoris po assisti a sa sessioni de arrenoamentu de sa presonia. Sa presonia sua est stètia stèrria bortas medas po àterus perìodus de 15 o 45 diis[7][8][9][10] arribendi a 500 diis de presonia in su mesi de làmpadas de su 2021[11] e 669 in totu[12].
Incumentzendi de sa noa de s'arrestu suu, amigus de Zaki, àterus studiantis, organizatzionis po is deretus civilis e universidadis italianas ant organizau adunàntzias de solidariedadi.[13]
David Sassoli, su presidenti de su Parlamentu Europeu, at organizau duus inchestas me in Strasbourg in friaxu 2020:[14] sa prima, su 10 de friaxu, at tzerriau s'atentzioni de is Rapresentantis e ddis at domandau de pediri a is autoridadis egitzianas de lassai a Zaki lìberu;[15] sa segunda, su 12 de friaxu at torrau a imbiai s'arrecherta e arregordau a is autoridadis egitzianas chi “s'amistadi de sa UE cun àteras natzionis cunfiant in su respetu de is deretus umanus e civilis, comenti cunfirmau de deliberas medas de su Parlamentu Europeu”.[16][17] Pedit una revisioni de su tratòngiu de s'Europa cun s'Egitu e preguntat si custu no iat a depi intzulliri un'impasada de s'acòrdiu de cumèrtziu lìberu, si Zaki e is àterus ativistas chi funt presoneris po debadas no funt postus in libertadi.
Bintises membrus italianus de su Parlamentu Europeu ant scritu una lìtera a s'ambassadori italianu de Cairo, Giampaolo Cantini, pedendi-ddi un'impignu sèriu po sa libertadi de Patrick Zaki.[18]
Philip Luther, diretori de sa circa e patrocìniu de Amnesty International po s'Àfrica de mesu-est e de su nord at nau “S'arrestu arbitràriu e sa tortura de Patrick Zaki est un'àteru esempru de su scontròriu arrexinau de su stadu de is difensoris de is deretus umanus e de is chi funt cunsideraus oposidoris, chi lompit a livellus prus artus dònnia dii.”[3] Sa pròpriu crìtica dd'at fata su Parlamentu Europeu su 18 idas de su 2020 cun unu testu innoi pediat sa libertadi po su studianti.[19] Amnesty International etotu at organizau s'eventu musicali "Voci per Patrick" (Boxis po Patrick) po su 8 de friaxu 2021, un'annu giustu de sa dii de formalisadura de sa presonia, innui aristas vàrius ant sonau po 12 oras in dereta in unas cantu prataformas in lìnia.[20][21]
S'organizatzioni Scholars at Risk at[1] pregau a is autoridadis egitzianas de liberai luegus a Zaki e, abetendi custu, de assegurai sa saludi sua, s'acessu a s'assistimentu legali, famìlia e curas mèigas. Doixi universidadis italianas chi funt parti de sa setzioni italiana de Scholars at Risk ant firmau una lìtera po is autoridadis egitzianas pedendi sa libertadi po Zaki.[22]
Unus cantu comunus italianus dd'ant donau sa citadinàntzia onorària. Intra custus ddoi at is biddamannas de provìntzia Bologna, Milanu[23], Nàpoli[24], Bari[25], Novara[26], Firenze[27], Chieti[28],Messina[29], Avellino[30], Salerno[31], Ferrara[32], Rìmini[33], Lecce[34], Udine[35], Pisa[36], Brindisi[37], Taranto[38], e Crotone[39].
Patrick Zaki est stètiu liberau su 8 de idas de su 2021 apustis de 22 mesis de presonia, comenti decìdiu sa dii innantis de su tribunali de Mansura, Egitu[40].
S'acusa, comenti e chi siat est abarrada[12] e su protzessu a Zaki est sighiu, mancai dilatau prus bortas, finas a arribai a su 18 de argiolas de su 2023, data innui su tribunali dd'at cundennau a tres annus de presoni. De custus, nd'abarrant un'annu e duus mesis, ca po su restu balit su tempus chi Zaki fiat giai impresonau[41].
Sa cundenna est arribada prus pagu de unu mesi a pustis de sa làurea de Zaki cun s'Universidadi de Bologna cun su votu de 110/110 e làude, arraxonende de sa tesi in video-cunferèntzia, ca no ddi fiat permìtiu a lassai s'Egitu innantis de sa fini de su protzessu[42].
Sa dii a pustis de sa cundenna at arriciu sa gràtzia de su presidenti egitzianu Abdel Fattah Al Sisi, in unu cuntestu innui Itàlia e Egitu megant de circai de amellorai is relatzionis diplomàticas insoru. Zaki est stètiu duncas liberau apustis de unu procedimentu durau prus de tres annus, e at decrarau de bolli torrai in Itàlia[43].