Vera, c' est on roman e walon, sicrît pa Lucyin Mahin, k' a moussî foû e 2011 dins l' coleccion «Paroles do Teroe» do Muzêye do Pårlaedje e l' Årdene.
Vera, c' est l' no do mwaisse persounaedje.
Li live a stî saetchî a 400 egzimplaires.
Li roman a rexhou so papî e 2011, eplaidî do Muzêye do Pårlaedje e l' Årdene dins l' rîlêye di live «Pårlaedjes do teroe». Mins les prumîs tchaptrês avént ddja parexhou sol waibe "L' Aberteke" dispu 2001.
Li coviete et les rabats sont-st enimådjîs pa José Schoovaerts.
Li tecse walon est rashiou e francès vizon vizu, ratourné avou l' aidance da Thierry Dumont, Olivier Esnault, Jean Cayron, José Schoovaerts, Willy Leroy, Mady d'Orchymont, Georges Sfasie, Louis Baijot, Joseph Docquier, Yannick Bauthière, André Gauditiaubois, Jeanne-Marie Frédérickx, Ernest Benoit, Bernard Louis, Chantal Denis, Jean Goffart, Christine Tombeur et Serge Fontaine (dins l' ôre des tchaptrês).
Li spoûle si passe el Crimêye, dins les anêyes 1990, mins, pa les viyès matenes k' on ndè cåze dins l' live, on rmonte al guere di Crimêye, ås campagnes di Rûsseye da Napoleyon Bonapåre pu da Hitler, et ås investixhmints bedjes el Rûsseye des Tsårs å cminçmint do 20inme sieke.
Veyes k' on ndè cåze :
Vera (Aminievna Tchoubarov) vént d' aveur si diplome d' infôrmaticresse. Ele mousse come estadjaire å Buro Marinov, ene pitite societé d' éndjolike. Ké binamêye pitite djin, avnante ki l' diåle, et djinteye a l' ovraedje. I l' inmèt bén tertos, al societé. Tertos ? Nén todi Tansou, li feme do patron eyet Natacha, ene pareye a leye.
Batisse Tchårlinov, on dintisse, c' est l' grand cama do patron (Zande Marinov). I provént d' ebagants walons. C' est lu ki tént l' pot droet cwand Zande n' est nén la. Tini l' pot droet, oyi, mins parvini a wårder l’ eglijhe e mitan do viyaedje ?
Gn a po cmincî on dvant-z-ouve, la ki li scrijheu s' esplike d' aveur plaecî si roman si "foû payis".
Adon, ene adviertance, la k' on aprestêye li lijheu(se) å sbarmint di sacwants ponts k' i (ele) n' est nén adût(e) di trover dins les lives e walon.
Adonpwis, les tchaptrês sont limrotés e continou, di 1 a 37. Ladvins gn a des "grands bokets" k' on lome "live", et k' i gn a 7 + l' "epiloke", titré "po vni foû conte".
Les "lives" sont come les "samwinnes" d' ene "Båke so les bwès d' l' Årdene". Si ça sereut on fouyton al tévé, c' est des des emissions k' i fåreut fé passer ene après l' ôte. Mins inte deus lives, on pout, li lijheu(se) rprinde alinne.
Li live ni tchereye nén dins l' ôre cronolodjike. Mins tchaeke tchatrê est daté, et on rapele todi les paskeyes ki s' ont ddja passé inte les côps. Al fén, gn a ene tåve avou les tchaptrês dins l' ôre cronolodjike.
C’ est on roman ås sacwants djinres :
Metou sol cou-coviete et so l' papî di rclame
E pårteye metou dins "Singulîs" 4/2010
Dji so-st ocupé a mete vosse live e pådjes. Dji m' rafeye a tchaeke côp del rilére. Si dji sereu meye djins, dji l' atchtêyreu meye côps. (Joël Thiry).
Di l' egzotisse, di l' erotisse, des spitants persounaedjes, on walon ki croxhe, on ctaeyaedje a hikets, vola li rcete do dierin roman da Lucyin Mahin. (Singulîs 4/2010, p. 10).
Gn a ene pitite flotche dins les nos rûsses : dins l' deujhinme no, on n' va måy riprinde li no del mame (Vera Arqiyevna); si l' mame n' est nén marieye, on prind l' no do grand-popa (Mohammed Soleih).
Dji creyeu ki dji rmeteu sacwants persounaedjes, come Tansou; mins tot conté tot rabatou, ça n' si pout nén ca dji n' a djamåy sitî e l' Oucrinne ! (Martine Mahin).
On a rcåzé di sacwants passaedjes ki djåznut des lingaedjes di l' Oucrinne come corwaitaedje des cåzes del guere d' Oucrinne.