Les abondroets so Wikipedia, c' est tos les abondroets k' on pôreut toutchî u dveur payî po-z eployî des tecses u des imådjes k' i gn a so l' eciclopedeye "Wikipedia", copurade li Wikipedia e walon.

Les tecses do Wiki sont dizo l' licince di libe documintåcion di GNU (GFDL).

C' est dizo l' responsåvisté di l' uzeu ki stitche on tecse so l' eciclopedeye di waeranti ki ci tecse la n' est nén ddja dizo abondroets.

Les bokets di scrijhaedjes, metans, po mostrer l' ouve d' èn oteur, ni dvèt nén esse trop longs.

L' eberweteu d' imådje sol Wiki doet waeranti li sôre d' abondroets ki ciste imådje la a. Les licinces les pus corantes, c' est :

• li licince GFDL : tot l' minme kî pout fé tot çou k' i vout avou l' imådje, li prinde por lu, l' candjî, li spåde, el vinde et wangnî bråmint des cwårs. Li seule sôre k' on n' pout nén fé, c' est del mete dizo ene ôte licince. Dj' ô bén k' on n' pout nén espaitchî les ôtes d' aveur les minmes droets di fé çou k' i vôrént avou.

• li dominne publik : c' est cwand tot l' minme kî pout fé tot çou k' i vout avou ene imådje, minme candjî ene crole eyet dire k' adon c' est lu k' a ls abondroets so cisse nouve modêye la k' est ene miete diferinne et k' on n' pout nén copyî cisse nouve modêye la (mins les viyes oyi, bén seur).

• l' uzaedje nén comerciå :
  • on pout eployî l' imådje, mins nén po fé des cwårs
  • On l' pout eployî seulmint so wikipedia

• l' uzaedje oniesse (fair-use) : On n' pout eployî l' imådje ki po enimådjî li sudjet k' a-st a vey avou, et l' imådje èn doet nén esse d' ene trop grande cwålité.