Anarchismus (abgläitet vo altgriech. ἀναρχία anarchia ‚Herrschaftslosigkäit‘; Derivazioon us α privativum und ἀρχή arche ‚Herrschaft‘) isch e bolitischi Ideäleer und Filosophii, wo d Herrschaft vom Mensch über Mensche und jedi Art vo Hierarchii as Form vo dr Underdrückig vo dr individuelle und kollektive Freihäit ableent.
D Anarchiste wäi e Gsellschaft, won e freiwillige Zsämmeschluss vo sälbstbestimmte Individue und Kollektiv isch. Under dr Anarchii, wi si s verstöön, wärde die hierarchische Struktuure vo dr menschlige Gsellschaft ufglööst – bis zur Abbschaffig vo dr Organisierthäit uf dr Ebeni vom Staat.
Im Middelpunkt stöön Freihäit, Sälbstbestimmig, Gliichberächdigung und Sälbstverwirkligung vo de Individue und kollektivi Sälbstverwaltig. Dr Anarchismus wird im ene sozialrevoluzionääre Sinn vo sine Verdräter as Synthese zwüsche dr individuelle Freihäit wie im Liberalismus und dr soziaale Verantwordig für d Gmäinschaft wie im Sozialismus verstande.
Mensche, wo noch deene Prinzipie lääbe oder e herrschaftsfreiji Gsellschaft aasträäbe, wärde as Anarchiste bezäichnet. Mänggisch wird s Adjektiv libertär (dütsch: freihäitlig) as Sünonüm für „anarchistisch“ brucht.
Commons: Anarchismus – Sammlig vo Multimediadateie Commons: Anarchisten – Sammlig vo Multimediadateie