Brokeback Mountain esch e Film vom taiwanische Regisseur ond Oscar-Priisträger Ang Lee usem Jahr 2005 ond basiert of de glichnamig Chorzgschecht vode US-amerikanische Schreftstelleri E. Annie Proulx. S' Drama öber d Liebi zwösche zwe Cowboys, wo vode Filmstudios Focus Features ond Paramount Pictures produziert worde esch, esch am 9. März 2005 z Düütschland ond z Öschtrich ide Kinos gstartet. Ide Schwiiz esch Brokeback Mountain bereits am 16. Februar id Kinos cho.

Handlig

De Ennis del Mar bewerbt sech im Früehjahr 1963 im Auter vo 19 Jahr bi de Arbetsvermettlig für Farm- ond Ranchpersonau omne Stöu. Er landet us Hert imne Schafzochtbetreb in Wyoming, wo er d Bekanntschaft metem glichautrige Jack Twist macht. De Jack schafft bereits de zwöit Sommer am Brokeback Mountain. De donkuhaarig Ma schwärmt för aues, was met Rodeo ztue hed.

Dör die lang Ziit wosi nors zwöite metde Schafherdi am Brokeback Mountain send, chömed sech die zwe Manne langsam nöcher. Üs de Fröndschaft entweckled sech scho baud e Liebi. Aus die beide nach dere Saison weder hei gönd, verlüred sech die 2 Manne us de Ouge. Si wennds zwar ned zuegäh, doch ennerlech liebed si sech. Trotzdem hüratet de Jack ond de Ennis 2 attraktivi Froue ond bedi gröndet Familie. Doch nach vier Jahre treffed si sech weder ond d Liebi entflammt nöi. Werds es Happy End gäh?

Kritik

• „Brokeback Mountain esch das seutene Deng, wo e grosse Hollywood-Tränerüehrer met wondervollem Schmerz aus Anguponkt. Es esch e nöiziitleche Western, wo sech zonere liislige, revolutionäre Liebesgschecht wandlet.“ (Entertainment Weekly)

• „Em Ang Lee si ned z verpassende ond onvergässleche Brokeback Mountain trefft sech wine Schoss is Härz. Er esch e Meilestei vo Föum, e Triumph före Heath Ledger ond de Jake Gyllenhall.“ (Rolling Stone)

Amerkige

• Luut Medieberechte hed de Heath Ledger inere Kossszene metem Jake Gyllenhall so störmisch agiert, dass er ehm fascht d Nase broche hätt.
• De Heath Ledger ond d Michelle Williams hend sech osserhaub vom Filmset könne ond liebe glernt. Si hend sech verlobt ond am 28. Oktober 2005 esch eri gmeinsam Tochter Rose Ledger ofd Wäut cho. De Götti esch de Jake Gyllenhall.
• Luut em Magazin Entertainment Weekly sou de US-Amerikaner Joaquin Phoenix (Gladiator) ursprönglech de erschti Schouspeler gseh si, wo Enteresse am Metwerke vom Föumprojekt zeiget hed.

Literatur

• Proulx, Annie: Weit draußen: Geschichten aus Wyoming. München: Luchterhand, 1999. Deutsche Übersetzung von Oskar Halbsattel. − ISBN 3-630-87039-2
• Proulx, Annie: Close range: Wyoming stories. New York: Scribner, 1999. − ISBN 0-684-85221-7 (engl. Ausgabe)
• Proulx, Annie; McMurtry, Larry; Ossana, Diana: Brokeback Mountain: story to screenplay. New York: Scribner, 2005. − ISBN 0-7432-9416-5
• Proulx, Annie: Brokeback Mountain. München: Heyne, 2005. − ISBN 3-453-35110-X
• Philippe Besson: Un homme accidentel. Paris: Edition Julliard, 2008. – ISBN 2-264-04851-4

Weblink

• Offizielli dütschi Website (nur Flash)
• Brokeback Mountain in dr Internet Movie Database
• Brokeback Mountain in dr Online-Filmdatebank
• Zämmesteuuig vo Kritike uf film-zeit.de