Dr Conrad Ferdinand Meyer (* 11. Oktober 1825 z Züri; † 28. Novämber 1898 z Chilchberg bi Züri) isch er Schwyzer Dichter vum Realismus gsii, wu vor allem historischi Novelle, Roman un lyrischi Gedicht gschaffe het. Är ghert mit em Gottfried Keller un em Jeremias Gotthelf zue dr wichtigschte dytschsprochige Schwyzer Dichter im 19. Johrhundert.
Dr Conrad Ferdinand Meyer isch as Suhn vum Regierigsrot Ferdinand Meyer (1799–1840) in ere Zürcher Patrizierfamilie uf d Wält chuu. Mit 15 Johr het er syy Vater verlore. Är het e zimli schwirig Verhältnis zue syre psychisch blaschtete Mueter Elisabeth/Betsy Meyer, geb. Ulrich (* 10. Juni 1802 z Züri), ghaa, wu sich am 27. Septämber 1856 z Préfargier umbrocht het.
E baar Johr in syre Juged het er z Lausanne gläbt, wun ere eso guet Franzesisch glehrt het, ass er franzesischi Literatur ibersetzt un sich iberlait ghaa het, e franzesische Schriftsteller z gee oder e akademischi Laufbahn as Romanischt yyzschlaa. No voreb er zwanzg gsii isch, isch er s erscht Mol wäg ere schwäre Depression in e Närvehailaastalt chuu.
Noch em Dod vu syre Mueter isch er dur e Erbschaft in gsichereti Verhältnis chuu. Är het mit syre Schweschter Betsy (1831–1912), wun em arg noo gstanden isch, e Italierais unternuu, wu ne große yydruck uf en gmacht het. Anne 1864 isch anonym syy erschte Gedichtband uusechuu. 1869 isch er mit syre Schweschter uf Chüsnacht am Zürisee iberegsidlet. Dr Chrieg zwische Dytschland un Frankrych 1870/71 het dr Meyer, wui in boode Kulture glänt het, in e diuefe Zwischpalt gworfe. Noch em dytsche Siig het er sich fir di dytsch Literatur entschide.
Literarische Erfolg het er zerscht anne 1872 ghaa, wun er mit 46 dr Gedichtzyklus Huttens letzte Tage vereffetligt het. In Zyt dernoo sin fascht all Johr historischi Novelle un Roman erschine. D Ufnahm vu Der Heilige dur dr renommiert Rusgeber Julius Rodenberg as Vorabdruck in di Deutsche Rundschau het em Meyer syy Ruef as rusragende Verzeller gfeschtigt. Anne 1880 het er d Ehredokterwird vu dr Universität Züri iberchuu.
Anne 1875 het er d Luise Ziegler ghyrote, d Dochter vum Zürcher Stadtbresidänt. Des het syy gsellschaftlg Aasää zimli gsterkt. Im Johr 1879 isch d Dochter Camilla uf d Wält chuu, wu anne 1936 wie ihri Grossmueter Sälbschtmord begange het. Em Meyer syy Frau het sich nit mit syre Schweschter verstande, wun em dr Huushalt gfiert un as Sekretäri fir e gschafft het. Anne 1887 het dr Meyer wider schwäri Depressione iberchuu. Syy letscht Wärch Angela Borgia het er nume mit Miei chenne fertigstelle. 1892 isch er wider in e psychiatrischi Hailaastalt yygwise wore. Är isch allmee in e Dimmerzuestand grote un isch 1893 entlosse wore, ohni ass sich e Besserig yygstellt ghaa het. Syyni letschte Johr het vu syyre Frau liebevoll bflägt, in syym Huus z Chilchberg verbrocht, wun er 28. Novämber 1898 im Alter vu 73 Johr gstorben isch. Z Chilchberg isch er au begrabe. Dr Louis Wethli het fir e ne Grabdänkmol in Form vun eme Obelisk gschaffe.
Em Conrad Ferdinand Meyer syy Wärch sin dur e hintergrindeige Humor gchännzaichnet. As Näbefigure chemme in ere Art Rammehandlig mänkmol prominänti Persone vor, wie zem Byschpel dr Schwedechenig Gustav Adolf (in „Gustav Adolfs Page“), dr Ludwig XIV. (in „Die Leiden eines Knaben“) oder dr Dante Alighieri (in „Die Hochzeit des Mönchs“). Doderby setzt dr Dichter voruus, ass dr Läser iber d Bedytig vu däne „Näbepersone“ Bschaid waißt. Mänkmol git s do aber au Iberraschige. Rammehandlig un Binnehandlig sin uf alli Fäll chunschtvoll mitenand verschränkt.
Syt 1938 vergit d Stadt Züri im Gedänke an dr Conrad Ferdinand Meyer dr Conrad-Ferdinand-Meyer-Bryys.
Commons: Conrad Ferdinand Meyer – Sammlig vo Multimediadateie
Conrad Ferdinand Meyer im dütschsprochige Wikisource
|
Dä Artikel basiert uff ere fräie Übersetzig vum Artikel „Conrad_Ferdinand_Meyer“ vu de dütsche Wikipedia. E Liste vu de Autore un Versione isch do z finde. |