| Coregonus
|
Felche
|
| Systematik
|
| Deilchlass: |
Ächti Chnochefisch (Teleostei)
|
| Überordnig: |
Protacanthopterygii
|
| Ordnig: |
Lachsartigi (Salmoniformes)
|
| Familie: |
Lachsfisch (Salmonidae)
|
| Underfamilie: |
Coregoninae
|
| Gattig: |
Coregonus
|
|
| Wüsseschaftlige Name
|
| Coregonus
|
| Linnaeus, 1758
|
Felche (Coregonus sp.; alemannischi Näme) isch e Fischgattig, wo zo de Famili vo de Salmfisch (Salmonidae) ghört. Si isch zimli aarteriich, i de Alpe gits rund 30 endemischi Aarte, devo alai i de Schwiiz mee as 20. Allerdings sind no nöd all Felchenarte erforscht und wüsseschaftlich bischribe. Meriri Arte sind i de letschte hundert Joor uusgstorbe.
Lebeswiis und Verbraitig
Felche wered je noch Art bis zo 70 cm lang, selte aber grösser as e Meter. Si esset chliinie Tier, wie Würmer, Schnegge oder Planktonchrepsli. Si lebet i chalte subere Seeje und reagieret recht empfindli uf Wasserverschmutzig. Groosi Waaserbauwerch vo Menschehand hend zomene Zämebruch vo Felchepopulatione gfüert, so im Walesee nochem Bau vom Linthkanal und i de Juraseeje, noch de Juragwässerkorektion.
D Felchenarte chömed i Seeje i de Alpe, uf de Britische Insle, z Skandinavie, z Poole, im Baltikum, z Russland und im nördliche Nordamerika vor. S werd agnoo, as noch de Iisziit d Felchenarte sich i chälteri Regione zruggzoge hend, so as d Felchenarte i de Alpe isoliert worde sind, wa d Artevillfalt guet erchlärt.
Gliderig
Felche hend vili lokaali Arte entwicklet, wo mengisch nu i grad aim See vorchömed. D Erforschig vo dene Arte isch no nöd abgschlosse und d Zueornnig i de Wösseschaft bis hüt no zom Tail umstritte. Drum isch au e Dörenand bi de wösseschaftliche Näme. Generell wered ahand vo de Lebeswiis meriri Gruppe underschide, wo aber nünt öber di genetischi Verwandtschaft uuseget:
- Grundfelche (Coregonus arenicolus-widgreni-gutturosus-Gruppe) lebed ufem Seebode und fressed dai voralem Schnegge und Würmer. Di grössere Sandfelche schwümmet selte tüüffer as 10 Meter und sind i de Uuferzoone und a de Seehalde zfinde. De chlinneri Chilch lebt mee i de Tüüffi und suecht sis Fuetter im schlammige Bode. Grundfelche chömed z Europa, z Asie und z Nordamerika vor.
- Schwebfelche (Coregonus wartmanni-nilssoni-macrophthalmus-Guppe) „schwebet“ öppe 10 bis 15 Meter under de Wasseroberflächi und ernääred sich under anderem vo Planktonchrepsli. Si chömed nu z Europa vor. De Blaufelch isch e gössere und de Gangfisch e chlinnere Vertretter vo de Schwebfelche.
- Wandermaräne (Coregonus oxyrhynchus-marenae-Gruppe) lebet a de Chüste vo de Nordsee und vo de Ostsee und wanderet i Flüss ine und sind hüüffig im Brackwasser z finde.
- Denebet gits ono Felchenarte wo nöd zo ainere vo dene drai Gruppe zuegornnet were chönet.
Felche i de Alpe
I de Seeje am nördliche Alperand zwösched Savoye und Bayere chömed öppe driissg Felchenarte vor, e paar devoo sind aber uusgstorbe. Imene See chöned bi sechs verschidnige Arte sii. D Underschaidig und d Binenig vo de ainzelne Arte isch nöd immer klar und zom Tail umstritte.
Die Seeje lönd sich zo Gruppe bilde, wo äänlichi oder gliichigi Arte lebet:
- Savoye: Lac d’Aiguebelette, Lac du Bourget, und Gempfersee
- Jura-Seeje: Noieburgersee, Murtesee und Bielersee. Im Murtesee sind al Felche verschwunde, well er z dreckg isch.
- Berner Oberland: Brienzersee und Thunersee
- Innerschwiz: Vierwaldstättersee, Alpnachersee, Sarnersee, Zugersee und mitnu ainere Art Sempachersee, Baldeggersee und Hallwilersee
- Linth-Limet: Walesee und Zürisee und mit zwo Arte Griiffesee und Pfäffikersee, obwoll die beede See in Rhii abflüsset.
- Bodesee, wobi de Undersee und de Obersee sich liecht underschaidet
- Bayere: Ammersee, Starnbergersee, Kochelsee, Walchensee, Tegernsee, Schliersee, Chiemsee und z Ööstriich: Mondsee, Attersee, Traunsee, Hallstättersee.
Uf de Alpesüüdsiite hend uusprüngli kai Felche glebt, doch sind i noiere Zitt Felche in Langesee und anderi norditalienischi Seeje uusgsetzt wore.
- Coregonus albellus Fatio - Brienzlig (alemanischi Näme; Thuner-, Brienzersee)
- Coregonus alpinus Fatio - Chropfer (Thunersee)
- Coregonus arenicolus Kottelat - Sandfelche (alem.N.; Bodesee)
- Coregonus atterensis Kottelat - Reinanke (Atter-, Mondsee)
- Coregonus austriacus Vogt - Kröpfling (Atter-, Wolfgangsee)
- Coregonus bavaricus Hofer - Ammersee-Kilch (Ammersee)
- Coregonus bezola Fatio - bezoule (Lac du Bourget, uusgstoorbe)
- Coregonus candidus Goll - bondelle (Noieburgersee)
- Coregonus confusus Fatio - Pfärrit (Juraseeje)
- Coregonus danneri Vogt - Riedling (Traunsee)
- Coregonus duplex Fatio - Grundler (Wale-, Zürisee)
- Coregonus fatioi Kottelat - Albock (alem.N.; Thuner-, Brienzersee)
- Coregonus fera Jurine - féra (Gempfersee, uusgstorbe)
- Coregonus gutturosus Gmelin (Coregonus acronius) - Bodesee Chilch (alem.N.; Bodesee, vermuetli uusgstorbe)
- Coregonus heglingus Schinz - Häglig (alem.N.; Wale-, Zürisee)
- Coregonus hiemalis Jurine - gravenche (Gempfersee, uusgstoorbe)
- Coregonus hoferi Berg - Schwebrenke (Chiemsee)
- Coregonus lavaretus L. - lavaret (Lac d'Aiguebelette, Lac du Bourget, Gempfersee)
- Coregonus macrophthalmus Nüsslin - Gangfisch (alem.N.; Bodesee)
- Coregonus nobilis Haack - Edelfisch (Vierwaldstättersee)
- Coregonus palaea Cuvier - palée (Juraseeje; im Gempfersee uusgsetzt)
- Coregonus renke Schrank - Renke (Ammer-, Starnberger-, Kochel-, Walchen- Tegern-, Schlier-, Traun-, Hallstättersee) Möglicherwiis sind meriri Felchenarte zämegfasst.
- Coregonus restrictus Fatio - férit (Murtesee, uusgstorbe)
- Coregonus suidteri Fatio - Balche (alem.N.; Baldegger-, Hallwiler-, Sempacher-, Zuger-, Vierwaldstätter-, Alpnachersee)
- Coregonus wartmanni Bloch - Blaufelche (alem.N.; Bodesee)
- Coregonus zuerichensis Nüsslin - Blaalig (alem.N.; Wale- Züri- Griife-, Pfäffikersee)
- Coregonus zugensis Nüsslin - Albeli (alem.N.; Zuger- Vierwaldstätter- Alpnacher- Sarnersee)
Commons: Coregonus – Sammlig vo Multimediadateie