| Dialäkt: Markgreflerisch (Obfige) |
D Gabriela Bart (* 1979 z Baar ZG) isch e Schwyzer Sproochwisseschaftleri. Syter anne 2019 schafft si as Redakteeri am Schwyzerische Idiotikon.
Vo 1995 bis 2000 het d Bart im Staatsarchiv vum Kanton Zug gschafft. In däre Zyt het si an Kantonsschuel Zug d Matura gmacht. Ab em Johr 2000 het si an dr Universiteet Züri Dytschi Sprooch- un Literaturwisseschaft, Allgmaini Gschiicht un Kriminology studiert. Anne 2006 het si s Studium mit em Lic. phil. I / Master of Arts abgschlosse. Scho as Studänti het si am Dytsche Seminar gschafft. Vu 2006 bis 2008 un wider vu 2010 bis 2017 het si am Dytsche Seminar an dr Universiteet Züri as Wisseschaftligi Mitarbaiteri gschafft. Deert het si am Projäkt «Syntaktischer Atlas der deutschen Schweiz» mitgfoorscht. 2019 het si bi dr Elvira Glaser iber «Possessivkonstruktionen im Schweizerdeutschen mit besonderer Berücksichtigung des possessiven Genitivs im Lötschental» promoviert.
Syt em 1. Augschte 2019 schafft d Bart as Redakteeri am Schwyzerische Idiotikon.[1]
Vu Jänner bis Dezämber 2009 het d Bart e Uusbildig an dr Ringier Schurnalischteschuel gmacht un e Volontariat bim SonntagsBlick Magazin, wu si derno au no sibe Monet lang derfiir as freii Schurnalischti gschriibe het. In dr Johr 2011 bis 2014 het si dernääbe au an dr Zuger Kantonsschuel as Stellverdrättigsleereri Dytsch unterriichtet. Ab Meerz 2015 het si as Täxteri un Lektoori fir d Texteria Gianella gschafft.
Zwelf Joor lang, vu 2000 bis 2012, isch si as Matroosi uf Schiff vu dr Zugersee Schifffahrt mitgfaare.