Die Geistigi Landesverdeidigung (frz. défense [nationale] spirituelle) isch e politisch-kulturelli Bewegig in dr Schwiiz gsi, wo vo öbbe 1932 bis in d 1960er Johr aktiv vo de Schwiizer Behörde, spezielle Institutione, Glehrte und dr Press aber au vo Kulturschaffende drait worden isch. S Ziil vo dere Bewegig isch d Sterkig vo Wärt und Brüüch gsi, wo mä as «schwiizerisch» betrachtet het, zum eso totalitäri Ideologie abzwehre. Zerst isch si vor Allem gegen e Nationalsozialismus und e Faschismus grichdet gsi, spöter während em Chalte Chrieg gegen e Kommunismus. Au wo die Geistigi Landesverdeidigung nüme aktiv vo de Behörde bedriibe worden isch, isch si bis wiit in d 1980er Johr wirksam bliibe und no hüte bruuche schwiizerischi Bolitiker hüfig Begriff und Metaphere vo dr Geistige Landesverdeidigung.