Dr Helmut Hubacher (* 15. April 1926 z Chrouchtu, Kanton Bärn, † 19. Augschte 2020 z Pruntrut[1]) isch e Schwyzer Bolitiker (SP), Autor un Kolumnischt gsii. Vu 1975 bis 1990 isch er SP-Bresidänt gsii.
Dr Helmut Hubacher het e Lehr gmacht bi dr SBB un si bolitisch as Jungsozialischt engaschiert un ab 1953 au as Gweerkschaftssekreteer. Anne 1963 isch er as eerschte Ersatzmann in Nazionaalroot noogruckt. Im nämlige Joor isch er Schefredakteer vu dr Basler Arbeiter-Zeitung woore, wu unter syre Fierig no im nämlige Joor in Die AZ Abend-Zeitung umgnännt wooren isch.[2] Vu 1975 bis 1990 het er as Bresidänt vu dr Soziaaldemokraatische Bartei vu dr Schwyz (SP) amtiert. Vor allem dr vu iim aagfiert offiziäll Bsuech vun ere Delegazioon vu dr SP Schwyz in dr DDR anne 1982, wun er dr Erich Honecker droffe het, het in dr Effetligkait fir Empeerig gsoorgt.[3] Dr Hubacher het si nie vum Bsuech in dr oschtdytsche Diktatuur dischtanziert ghaa, was allno kritisiert wiird.[4][5]
Mer chännt en aber au dur sy Skandalisierig vu dr Armee. Zum Byschpel het er uf Missständ im Bschaffigswääse ufmeerksaam gmacht wie uf dr Chauf vum Radaarsischteem «Florida» un dr Böu vum Schwyzer Panzer 68. Drotz syre Kritik het si dr Hubacher aber alliwyl zu dr Landesverdaidigung gstande. Dr Hubacher het di Soziaaldemokraatisch Bartei as modäärni linki Volksbartei posizioniert.[6]
Ab 1991 het er im aktiive Ruestand gläbt un het Biecher gschriibe un all Wuche ne Kolumne fir d Basler Zeitung (BaZ) un vu 2019 bis 2020 all zwoo Wuche d Kolumne «Der Alte» fir dr Blick.[7] In dr BaZ het er si dooderbyy kritisch mit dr Schwyzer Bolitlandschaft ussenandergsetzt.[8][9] Wäg ere Chranket het dr Hubacher mit syre BaZ-Kolumne im Juni 2020 no 22 Joor ufgheert uns y Ruggzuug us dr Effetligkait verchindet.[10]
Dr Helmut Hubacher isch zyter anne 1949 mit syre Frau Gret, gebooreni Hungerbühler, ghyroote gsii, si hän drei Chinder ghaa un im Doorf Courtemaîche (hitte zue Basse-Allaine) im Kanton Jura gwoont.[11][6] Si hän si bi dr Jungsozialischte z Baasel chännegleert ghaa.
Sy Täxt het dr Hubacher uf dr Schrybmaschiin – s Internet het er nit bruucht.[6]
Dä Artikel basiert uff ere fräie Übersetzig vu dere Version vum Artikel „Helmut_Hubacher“ vu de dütsche Wikipedia. E Liste vu de Autore un Versione isch do z finde. |