Dr Igor Fjodorowitsch Strawinski (russisch Игорь Фёдорович Стравинский, frz. Transkripzion Igor Stravinski, ängl. Transkripzion Igor Stravinsky; * 5. Junijul./17. Junigreg. 1882z Oraniebaum, Russland; † 6. April 1971 z Nöi York) isch e russisch-französisch-amerikanische Komponist gsi und äine vo de bedütendste Verdräter vo dr „Nöije Muusig“.
Dr Strawinski isch z Oraniebaum in dr Nööchi vo Sankt Petersburg z Russland uf d Wält choo. Wie si Vater het er Jura z St. Petersburg studiert und 1905 dr Abschluss gmacht. Denn isch er aber e Schüeler vom Nikolai Andrejewitsch Rimski-Korsakow worde. 1910 isch er zum erste Mol uf Bariis. Dört si d Ballett Der Feuervogel und spööter Petruschka und Le sacre du printemps ufgfüert worde. Sit 1920 het dr Strawinski mäistens in Frankriich gläbt; 1934 isch er franzöösische Staatsbürger worde.
Wägen em Zwäite Wältchrieg het er Frankriich verloo und isch uf Amerika. 1946 isch er amerikanische Staatsbürger worde. Er isch zerst vor allem under russische Exilante bliibe, het denn aber mit em Komponist und Musiker Robert Craft öbber gfunde, won em ghulfe het sich besser z integriere.
Im Joor 1967 het dr Igor Strawinski dr Eeredokter vo dr Rutgers University in New Jersey überchoo.
Dr Igor Fjodorowitsch Strawinski isch am 6. April 1971 z Nöi York gstorbe; er isch denn z Venedig begraabe worde, wien er s gwünscht ghaa het.
Commons: Igor Fjodorowitsch Strawinski – Sammlig vo Multimediadateie