D Jakobiner im formelle Sinn si d Mitgliider vom ene radikale politische Klub wäärend dr Franzöösische Revoluzioon gsi. Vo 1793 aa si d Aahänger vom Maximilien de Robespierre as Jakobiner bezäichnet worde. Si häi die politischi Linggi verdräte und häi sich u. a. für d Abschaffig vo dr Monarchii iigsetzt. Vor allem die stedtische Underschichte häi d Jakobiner understützt.
Im witere Sinn bezäichnet dr Begriff Jakobiner au d Aahänger vo dr Revoluzioon in Frankriich sälber und im Usland, wo zwar nid Mitgliider vom Jakobinerklub gsi si, sich aber au noch dr Hiirichdig vom Köönig Ludwig XVI. no zu de Ideal vo Freihäit, Gliichhäit und Brüederlighkäit bekennt häi und e republikanischi Staatsform aagsträbt häi.
Dr Name Jakobinerklub het sich uf e Versammligsort bezooge, s Jakobinerchloster Saint-Honoré z Bariis.
