Dr Kubismus isch e Sammelbezeichnig, wo in dr Kunstgschicht bruucht wird, für e zentrali Bewegig vo dr französische Avantgarde, wo sich in dr Moolerei entwicklet und in de Wärk vom Pablo Picasso und vom Georges Braque noch 1907 zeigt het, aber au d Plastik beiiflusst het. Mä goht vom sogenannte Frühekubismus us und underscheidet in dr Stilrichdig vom Kubismus im Allgemeine no dr analytisch, dr synthetisch und dr orphisch Kubismus.
Dr Kubismus het z Frankriich dr Fauvismus abglöst und mä chan en, wie sälle au, keim fest umrissene Programm non ere Schuel zueordne. Anderi Verdräter vom Kubismus si dr Juan Gris, für e synthetisch Kubismus, und d Salonkubiste Fernand Léger, Jean Metzinger, Albert Gleizes, Henri Le Fauconnier und dr Robert Delaunay, wo uf en dr orphisch Kubismus zrugggoht.
Us hütiger Sicht isch dr Kubismus die revolutionärsti Neuerig in dr Kunst vom 20. Johrhundert. D Bibliographii zum Kubismus isch umfangriicher as zu jeder andere Stilrichdig in dr modärne Kunst. So isch dr Iifluss vo de kubistische Wärk uf d Stilrichdige, wo spöter cho si, bischbillos.[1]
