Le Corbusier (* 6. Oktober 1887 z La Chaux-de-Fonds im Schwiizer Kanton Neueburg; † 27. August 1965 z Roquebrune-Cap-Martin bi Monaco; bürgerlig Charles-Édouard Jeanneret-Gris) isch e schwiizerisch-französische Architekt, Architekturtheoretiker, Stadtplaner, Moler, Zeichner, Bildhauer und Möbeldesigner gsi.
Le Corbusier isch eine vo de bedütendste und iiflussriichste Architekte im 20. Johrhundert gsi. Si Archidekturleer nimmt sich die räini Funktionalität vo dr Maschine zum Vorbild für d Gstaltig vo Gebäud. S Resultat si klari und äifachi Linie und Körper, wo sich uf die geometrische Grundforme vom Rächtegg, Kräis und Quader stütze. Eso het dr Corbusier dr Raame vom Brutalismus festgläit.
Siini neue Ideä hai aber au Kontrovärse usglöst und si deilwiis bis hüte umstritte. So sait der Hans Kollhoff, Professor für Architektur an der ETH Zürich: «Seinen rigorosen städtebaulichen Großprojekten ist ein totalitärer Charakter nicht abzusprechen».[1]
Währed em Zweite Wältchrieg het er äng mit em Vichi Régime kollaboriert und mit em Hitler und de Faschiste sympathisiert. Der Lausanner Architekturhistoriker und Professor an der EPFL Pierre Frey beschriibt en eso: «Le Corbusier war ein radikaler Theoretiker einer Art räumlichen Eugenik und ein rabiater Antisemit … Le Corbusier hätte, ohne mit der Wimper zu zucken, auch für Hitler gebaut.»[1]
De Le Corbusier hät e paar Uuszaichnige und Ehre-Dökter übercho. Er isch au uf de aktuelle Schwizer 10-Franke-Noote dargstellt.