| Lemmy Kilmister | |
|---|---|
 Dr Lemmy im Johr 2005
| |
| Date | |
| Geburtsname | Ian Fraser Kilmister |
| Übername | Lemmy Kilmister Ian Fraser Willis |
| Uf d Wält cho | 24. Dezämber 1945 Burslem, Stoke-on-Trent, Staffordshire, Ängland, UK |
| Gstorbe | 28. Dezämber 2015 Los Angeles, Kalifornie, USA |
| Genre | Heavy Metal, Speed Metal, Rock and Roll, Hard Rock |
| Beschäftigung | Musiker, Schauspiiler |
| Instrument | Bass, Singer, Gitarre, Harmonika |
| Aktiv | sit 1965 |
| Het gspiilt mit | Motörhead, Hawkwind, The Damned, The Rainmakers, The Rockin' Vickers, Opal Butterfly, Sam Gopal, The Head Cat, Girlschool, Probot, Ozzy Osbourne, Slash, The Jimi Hendrix Experience, Airbourne |
| Website | imotorhead.com |
| Bemerkenswärti Instrument | |
| Rickenbacker 4001 Gibson Thunderbird | |
Dr Ian Fraser 'Lemmy' Kilmister (* 24. Dezämber 1945 z Burslem, emene Stadtteil vo Stoke-On-Trent z Staffordshire in Ängland; 24. Dezämber 2015 z Los Angeles) isch Frontmaa vo dr wohl lütischte Band uf de Wält gsi: Motörhead.
Die Musiglegände isch dr Sohn vomne Fäldkapplan vodr Royal Air Force usem 2. Wältchrieg und enere Bibliothekarin. Scho churz nach sinere Geburt hedne si Vater verla und dr Lemmy isch vo zwei Fraue, sinerä Muätter und Grossmuätter, grosszoge worde. Id Grundschuel ischer z Madeley, idr Nöchi vo sinere Geburtsstadt. Ohni Schuelabschluss ischer mid 15ni vodr Schuel gfloge. Är seid, sini Chindheit sig schön gsi und im Summer heder alligs ufdr Fähri, idr Fabrik und idr Riitschuel gschaffed, wobi d Fabrik dr Horror gsi isch, wiener spöter gseid hed.
Mit 16 heder siis Drheime verlaa und isch uf Manchester zoge. Ändi 1960 ischer uf London gange und hed sich mit Glägeheitsjobs über Wasser ghalte, unter anderem ischer Roadie vom Jimi Hendrix gsi. 1975 heder Motörhead gründet, woner bis hüt Bassist und Sänger isch. Sit 1990 läbter z Los Angeles inere Zweizimmer-Wohnig idr Nöchi vo sinere Stammkneipe, em Rainbow, woner bis hüt läbt. Dr Lemmy isch nie verhüratet gsi und hed zwei Söhn, de Sean und de Paul.
Sini Markezeiche sind zwei uffälligi Fibrom ufdr lingge Bagge gsi, wo fälschlicherwiis vil als Warze bezeichnet worde sind, si Rickebacker-Bass, Speed, Spielautomate und die us Jack and Coke (Jack Daniels old No. 7 mit Coca-Cola uf Ys) und Marlboro Red resultierendi, ruchi Stimm. Trotz sim extreme Alkoholkonsum hedmerne nie handligsunfähig gse oder hed suschtigi Uffäligkeite oder Ischränkige dure Alkohol bemerkt.
Dr Lemmy hed dr Glaube a Gott strikt abglehnt, was au i siine Text immer wieder vorchunt. Är hed liideschaftlich Nazi-Gägeständ gsammlet, wäg dem ischer auscho öfters idr Kritik gstande, gsehd sich sälber aber fascht scho als Pazifist und keinesfalls als Ahänger vo dere Ideologie. Sini zwei Zimmer sind allgemein randvoll mit irgendwelchne Sache, wiler halt gärn gsammlet hed.
D Legände um sii Spitzname Lemmy isch umstritte. Mer seid, daser uf Tour immer ade Spielautomate ghocket isch und drum wäg chronischer Gäldknappheit immer wieder gfragt hed: 'Can you lem'me five?' 'Lem'me a fiver!' (engl. Chaschmer en Füfer uslehne? Lehnmer en Füfer us!) und so die andere um Gäld apumped hed. Är sälber seid aber, daser scho mit 10ni Lemmy gheisse hed.
Trotz sim Läbensstil, sim Diabetes undem Bluetdruck hed dr Lemmy bis 70i trotzdem immer witer gmacht. Dadrzue hed er gseid, aser nid tod umghiie wird, sondern verpufft und är läbi sin Traum, wiso sötter verwache wölle? Zwei Täg vor sim Tod hed er vonere Chräbserchrankig erfahre. A dere isch vier Täg nachem 70. Geburi gstorbe.
Dr Lemmy Kilmister isch Teil vo grosse Momänt ide Rockgschicht. Är hed dBeatles im Cavern Club zLondon gse, bevor die überhaupt öppis veröffentlicht hend, isch Roadie vom Jimi Hendrix gsi und hed de Sid Vicious (Bassist vode Sex Pistols) unterrichtet. En sehr iflussrichi Ussag vom Lemmy isch, daser en Zit vorem Rock'n'Roll erläbt hed. Mer hed nur chönne Rosemary-Clooney-Platte chaufe, also die Musig wo dMüättere glost hend. Är hed sini Platte überne Elektrolade chönne bstelle, obwohl dr Bsitzer gar kei Lizänz derfür gha hed, es isch meh en Fründschaftsdienst gsi.
Um ade Meitschi idr Schuel zgfalle heder 1957 zum erschte Mal en Gitarre id Finger gnu, nämlich dHawaii-Gitarre vo sinere Muätter. Är hed sich sSpile sälber bibracht, hed also nie Gitarreunterricht gnu. Sini erscht Band zWales hed The Sundowners (später The DeeJays) gheisse. Afang 1960, woner uf Manchester cho isch, isch dört und zLiverpool grad en Musigstil entstande, dr Merseybeat. Dr Lemmy hed i verschiedenste Bands gspilt, unter anderem bi The Rainmakers, The Motown Sect und 1965 ischer Gitarrist bi Reverend Black und The Rocking Vicars worde. Mid letztere heder ide Jahr 1965 bis 1967 es paar Lieder ufgno. Afang 1967 hedr dBand verla und isch uf London gange. Dert heder zerscht Jobs bi verschiedene Musiker (z. B. bim P.P. Arnold) gha, bevor är 1968 als Sänger bi Sam Gopal agfange hed. Mid ihne heder sAlbum 'Escalator' ufgno. Nachem Scheitere vo Sam Gopal ischer für churzi Ziit Mitglied bi Opal Butterfly gsi, hed die Band aber nachem ufnä vo nur eim Lied wieder verla. 1971 isch über dr Dikmik Davies dr Kontakt zu Hawkwind entstande, woner rund 4 Jahr drbie gsi isch und au einige Albe veröffentlicht hed. D Band hed sich 1975 trennt, usschlaggäbende Punkt isch am Lemmy sini Festnahm wäge Drogebsitz am kanadische Zoll gsi.
Churz drna hedr en Band gründet, woner zerscht hed welle Bastards nenne, wo bis hüt aktiv isch und tief id Musiggschicht igange isch: Motörhead. Mid Motörhead stad dr Lemmy sit 1975 ufdr Bühni. En Band wo immer presänt gsi isch und diversi Musigström überduret hend und ohni ei falsche Chnoche i ihrem Körper verleiid sie ihrere Musig dä unverwächselbar Charakter. Sie läbid, was sie sägid. „Alles isch möglich!“ seid dr Phil Campbell, sit 1983 Gitarrist vo Motörhead, wener sich zruggerinnered, daser mit 12-jährig vom Lemmy es Autogramm übercho hed, woner mit Hawkwind i sinere Stadt es Konzärt gä hed. Wenn ihm dert öpper gseit hät, daser so lang mit ihm wird Musig mache, hätterne warschinlich usglachet.
Näbe Motörhead hed er au ide Rockabilly-Band The Head Cat gspilt. Sie sind entstande, wo dr Slim Jim Phantom es Lied fürd Elvis-Gedänkplatte hed wölle ufnä. Nachdem sie sLied aufgno hend, hends eifach nochli witergspilt und ufgrund vo gmeinsame Inträssene und durs kenne vodr gliche Songs isch denn es Album entstande. Sini musikalische Iflüss sind eh und je die gliche guete, alte Sache, wie dr Little Richard, The Beatles, und dr Elvis gsi. Unter anderem heder en Vorliebi für Country gha, wo nachem Lemmy die beschte Harmoniä vo Counrty-Sängerinne wie dr Buddy Holly chömid.
Als ursprüngliche Gitarrist hed sich dr Lemmy nid guet gnueg gfunde und hed bim Istig bi Hawkwind zum Bass gwächslet. Är hed dTechnik, womer normalerwis bi Rhythmus-Gitarre brucht, bibhalte und so en eigene Stil entwicklet. Är bevorzugt si Rickenbastard (si Bass) und allgemein Instrumänt vodr Firma Rickenbacker, wo zu sim Markezeiche worde sind. Si unverwächselbar Bassklang erreichder, indem er alli Regler vo sim Marshall-Verstärker uf die lütischt Stufe stellt. Är hed sis Mikrofon immer chli zhoch, daser bim singe dr Chopf muess ufehebe. Au das isch es Markezeiche vo ihm. Es stammt no vodr Afangsziite vo Motörhead und isch nach siine Agabe sehr bequem.
Dr Lemmy isch au als Autor und Produzänt für anderi Musiker tätig gsi. So heder unter anderem Liedtext füre Ozzy Osbourne, dLita Ford, Girlschool und für dRamones gschribe.