D Melanie Nicole Mettler (* 3. Dezämber 1977, haimetberächtigt z Wichtrach)[1] isch e Schyzer Bolitikeri (glp). Syter anne 2019 isch si Mitgliid vum Schwyzer Nazionaalroot.
D Melanie Mettler het Literaturwisseschafte, analytischi Philosophy un Sproochwisseschafte studiert un derno in Anglischtik mit ere kulturwisseschaftlige Untersuechig zue kosmobolitische Wäärt in dr Literatur promoviert.[2][3]
Si schafft as Co-Gechäftslaiteri vun eme Informazioonsportaal fr Aarbetgeeber zur Berueflige Integrazioon.[4][5][6] Siibe Joor lang isch si Dozänti un Berooteri am World Trade Institute gsii, eme interdisziplineere Foorschigs- un Uus- un Wyterbildigsinschtitut vu dr Universiteet Bärn im Beraich Wälthandelsregulierig. As Berooteri fir Soziaali Innovazioon het si d Plattform Soziale Innovation Bern Accelerator (SIBA) mitgrindet un isch hite däre iri Co-Bresidänti.[7] Si isch derzue au Mitgrinderi vum Crowdfunding-Projäkt Sunraising, wu Community-Solaar-Aalaage in Stadtbärner Quartier finanziert. Si isch Co-Bresidänti vum Bärner Kultuurzäntrum Dampfzentrale[8] un Voorstandsmitgliid vu dr iiberbarteilige Verainigung Neue Helvetische Gesellschaft.[9]
As eerscht bolitisch Amt het d Melanie Mettler vu 2010 bis 2013 dr Mittelböu in dr Philosophisch-historische Fakulteet vu dr Universiteet Bärn verdrätte.[10] 2013 isch si in d Bärner Stadtroot (Legislativi) gweelt woore, wu si verschiideni barlamentaarischi Funkzioone ibernuu het: Unter anderem isch si vu 2013 bis 2015 Mitgliid vu dr Agglomerazioonskummissioon gsii, 2014 het si as däre iri Bresidänti gamtet. Vu 2016 bis 2017 isch si Mitgliid vu dr Kummissioon fir Blaanig, Vercheer un Stadtgrien gsii.[11] Vu 2013 bis 2019 het si d Frakzioon vu dr Grienliberaale un Junge Grienliebraale im Bärner Stadtroot bresidiert[11] (bis Ändi 2016 zäme mit em Peter Amman).[12] Iiri bolitische Schwäärpinkt sin d Stadtentwicklig, Vercheer un d Energywänd.[13][14][15] Anne 2016 isch si im Amt as Bärner Stadtreeti (Legislativi) bsteetigt woore,[16] derzue het si erfolgloos fir dr Bärner Gmairoot (Exekutive) kandidiert.[17][18] Bi dr Nazionaalrootswaale 2019 isch d Melanie Mettler in Nazionaalroot gweelt woore.[19] Deert isch si Mitgliid in dr Kummissioon fir soziaali Sicherhait un Gsundhait.[20]
D Melanie Mettler läbt in dr Stadt Bärn.
Dä Artikel basiert uff ere fräie Übersetzig vu dere Version vum Artikel „Melanie_Mettler“ vu de dütsche Wikipedia. E Liste vu de Autore un Versione isch do z finde. |