As Opere (vo ital. opera in musica, „musikalischs Wärk“) bezäichnet mä sit 1607 e musikalischi Gattig vom Theater, won e szenisch-dramatischi Handlig dur Muusig daargstellt wird. Usserdäm wird au s Operehuus (s Theater, wo Opere ufgfüert wärde) oder d Theaterkompanii, wo Opere uffüert, as Opere bezäichnet.
Mit Opere mäint mä im Allgemäine die öiropäischi Opere, wo im hütige Sinn am Ändi vom 16. Joorhundert z Floränz entstande isch und sich as italiänischi Opere in Öiropa verbräitet het. Spööter het si regionaali Äigeschafte aagnoo, vor allem het mä sä in de nazionaale Sprooche afo konzipiere und uffüere.
Die Chinesischi Opere (chin. 戲曲 / 戏曲, Xìqǔ) isch wääred dr Tang-Dünastii (618–906) us Vorforme vom chinesische Muusigtheater entstande. Im Geegesatz zur öiropäische Operedradizioon wo immer eender elitäär gsi isch, isch die chinesischi vo Aafang aa volksnooch gsi und erst spööter häi sich au die hööchere Ständ für sä afo begäistere.
Japan het sini äigeni Dradizioon vo Muusigtheater und öiropäischi Begriff si nid seer zuedräffend. S Noh ( 能?) oder nōgaku (能楽?), wo sit em 14. Joorhundert gspiilt wird, und Kabuki (歌舞伎 kabuki?) chönnt mä villicht am beste mit Danztheater bezäichne.
Dr Form nooch underschaidet mä zwüsche dr Nummereopere, won e Räije vo Muusigstück dur Rezitativ oder gschwätzti Dialog mit enand verbunde wärde, und die duurekomponierti Opere oder s Muusigdrama, wo die musikalischi und emozionali Entwicklig e Kontinuum dur s ganze Wärk duure bildet.
Im Inhalt nooch git s d Opera seria (Hooche Stiil) und d Opera buffa (Niidere Stiil), wo öbbe dr Dragödie oder em Drama repektiv dr Komödie im Sproochtheater entspräche.
D Opere underschäidet sich vom Schauspiil in däm, wie zentraal d Muusig isch. Im Mozart sini Singspiil zum Bischbil zelt mä zu de Opere, wääred im Nestroy sini as Schauspiil gälte. Äänligs gältet bi dr Danzopere wo dr Underschiid din lit, öb dr Danz oder d Muusig zentraaler si. D Operette und d Miusikal si in Zite entstande, wo d Opere duurekomponiert gsi isch, und si häi d Dradizion vom früenere Niidere Stiil witergfüert in dr Form vo Nummereopere.
Commons: Oper – Sammlig vo Multimediadateie
|
Dä Artikel basiert uff ere fräie Übersetzig vum Artikel „Oper“ vu de dütsche Wikipedia. E Liste vu de Autore un Versione isch do z finde. |