De Peipussee (estn. Peipsi-Pihkva järv; russ. Чудско-Псковское озеро / Tschudsko-Pskovskoe ozero) isch de föftgrööst See vo Europa. Er litt a de Grenze zwöschet Estland und Russland.

Geografii

De Peipussee het e Flächi vo 3'555 km² und isch dodemit öppe sibemol grösser as de Bodesee. Er litt ufere Höchi vo 30 m.ü.M. und isch im Durchschnitt sibenhalb Meter tüüff. Di tüffst Stell litt im Pleskauersee und messt 15 Meter. De See messt i de Längi 143 km und a de braitiste Stell 50 km. 44% vom See ghöret zu Estland und 56% zu Russland. De Peipussee het öppe drissg chlinneri Zueflüss, entwässeret werd er vo de Narwa, wo in Finnische Meerbuse mündet.

De See tailt sich i drai Seee:

• de Peipsisee (estn. Peipsi järv; russ. Чудское озеро / Tschudsko ozero; dt. Grosse See) isch mit 2'611 km² (73%) de grössti Tail und litt im Norde.
• de Pihkvasee (estn. Pihkva järv; russ. Псковское озеро / Pskovsko ozero; dt. Pleskauersee) litt im Süüde un het e Flächi vo 708 km² (20%).
• de Lämmisee (estn. Lämmijärv; russ. Тёплое озеро / Teploe ozero; dt. Warmensee) verbindet di beede andere See und het e Flächi vo 236 km² (7%)