De See werd vo de Sihl durflosse und hät drü Bauwärch, wonen staued. Do isch emol e 33 Meter hochi und 124 Meter langi Stumuur am Nordendi vom See, wo de Abfluss i d Sihl reglet. Im Nordweste verhinderet de Hüendermattdamm, wo mit schwäre Stai uf de Seesyte baut worde isch, es abflüüsse i Richtig Alp (en Fluss, wo vom Brunni her chunnt). Dänn häts no am ander Endi (Südsyte) en öpe 800 Meter lange Abschlussdamm, wo es Überlaufe quasi rückwärts i Richtig Underiibrig oder Stuude verhinderet.
Mit ere Flächi vo 10,72 km² isch de Sihlsee de flächemässig grösti Stausee vo de Schwiz. Er hät e Längi vo 8,5 km und e maximali Braiti vo 2,5 km. Mit ere Tüüfi vo 23 Meter isches zuglich vo dä grosse Stauseea i de Schwiz, dä, wo am wenigste tüüf isch. D Höchi vom normale Wasserspiegel werd mit 889 m ü. M. aageh.
di vorder Brugg vo Birchli uf Wilerzäll übere
Gschicht
Mit em Bau vo de nötige Bauwärk, inkl. dä beede Brugge und de Strosse rundume, hät me 1932 aagfange. 1937 isch denn s Tal gflueted worde und de Betriib vom Etzelwärk zwüsched Altedorf und Pfäffike ufgno worde.[1]
