D Stereoskopii (griech. stereos = Ruum/rüümlig, fest[1] – skopeo = aaluege[2]) isch d Wiidergoob vo Bilder eso, ass si dr Iidruck mache e rüümligi Diefe z haa, wo füsikalisch nit vorhande isch. In dr Umgangssprooch bezäichnet mä d Stereoskopii falsch au as „3D“, au wenn s sich nume um zwäidimensionaali Abbildige handlet, won e rüümlige Iidruck mache ("Ruumbild"). Normaali zwäidimensionaali Bilder, wo nid dr Iidruck vo Diefi gään, bezäichnet mä as monoskopisch (griech: μονος, monos „äins“ → äifach).
S Brinzip isch, ass Mensche wie alli Brimaate und die mäiste Raubdier iiri Umgääbig mit zwäi Auge gliichzitig us zwäi verschidnige Blickwinkel gseen. Eso cha s Hirni schnäll iischetze, wie wit ewägg d Objekt si und eso bechunnt s e rüümligs Bild vo dr Umgääbig über, ooni dr Chopf hin und här z beweege. D Stereoskopii befasst sich aso nume drmit, em lingge und em rächte Aug zwäidimensionaali Bilder us zwäi Bedrachdigswinkel z zäige, wo liicht von enander abwiiche. D Verfaare do drzue si aber underschidlig.
Alli andere Äigeschafte vom ene zwäidimensionaale Bild, wie perspektivischi Verzerrig, wo von ere unnatürlige Objektivbrennwiti abhänke, d Farb und bsundrigs aber au d Bindig vom Betrachder an e Standort, wo beschränkend isch, git s immer no. Grad die bäide letzte Äigeschafte vo däm Ruumbildverfaare mache dr grooss Underschiid zur Holografii us, wo brobiert, Objekt vollständig, also dreidimensionaal (in 3D), abzbilde und vorzzäige.
