Dr Urs Jaeggi (* 23. Juni 1931 z Soledurn, dert au haimetberächtigt; † 13. Februar 2021 z Berlin) isch e Schwyzer Soziolog, Schriftsteller un bildende Chinschtler gsii.
Dr Urs Jaeggi isch e Suhn vum Notar Josef Jaeggi gsii. No dr Schuel het er Bankchaufmann glehrt un fimf Johr lang im däm Beruef gschafft. Glychzytig het er uf em zweete Bildigswääg d Matura gmacht un derno Nationalekonomy, Soziology un Chunschtgschicht z Gämf, z Bärn un z Berlin studiert[1]. Anne 1959 isch er an dr Universitet Bärn zum Dr. rer. pol. promoviert wore. Dert isch er Assischtänt vum Entwickligssoziolog Richard Fritz Behrendt gsii. Derno het er vu 1959 bis 1961 as wisseschaftlige Assischtänt an dr Universitet Münster un an dr Sozialforschigsstell z Dortmund gschafft. Ab 1961 het er am Soziologische Inschtitut vu dr Universitet Bärn glehrt, wun er 1964 habilitiert woren isch. Anne 1965 isch er dert Usserordelige Brofässer fir Soziology wore. In dr 1960er Johr isch er mit dr Psichologi Eva Jaeggi ghyrote gsii. Iri gmainsam Dochter Rahel Jaeggi isch Brofässeri fir Praktischi Filosofy an dr HU Berlin.
Anne 1966 isch er an di nei grindet Ruhr-Universitet Bochum grindet wore, wun er ne Lehrstuehl fir Soziology ghaa het. Dail vu dr Studäntebewegig hän si uf sy Wäärch bezoge, vor allem uf d Analyse in Macht und Herrschaft in der Bundesrepublik (1969). Andersch wie dr Leo Kofler, sy Noofolger uf em Bochumer Lehrstuel, het dr Jaeggi sy Arbet uf em Biet vu dr soziologische Theory mit Aasätz vu dr empirische Sozialforschig verbunde un het dodmol unter anderem wichtigi Arbeite zur Bolitische Soziology vereffetligt. 1970/71 het er as Gaschtbrofässer an dr New School for Social Research z New York glehrt. Vu 1972 bis 1992 isch dr Jaeggi Ordinarius am Inschtitut fir Soziology vu dr Freie Universitet Berlin gsii, wun er unter anderem no dr Dissertation vum Rudi Dutschke gluegt het[2]. Am Änd vu däre Zyt het er die Stell mit ere Kollegi dailt, go si dr Bildhauerei z chenne widme. Dr Jaeggi het au ne Atelier ghaa.[3]
Dr Urs Jaeggi het ni nume e Hufe soziologischi Arbeite verfasst, är het bn dr 1960er Johr au belletristischi Wäärch gschriibe un isch doderfir e baar Mol uuszaichnet wore. Unter anderem het er anne 1981 mit Ruth, eme Uuszug us sym Roman Grundrisse, dr Ingeborg-Bachmann-Bryys gwunne[4]. Sy Nooloss isch im Schwyzerische Literaturarchiv z Bärn. Ab 1985 het dr Jaeggi au no as Mooler, Bildhauer un as Aktionschinschtler gwiirkt. Sy letschti großi Uusstellig isch im Summer 2020 z Berlin gsii.
Dr Urs Jaeggi het z Berlin un z Mexiko-Stadt gläbt. Är isch im Februar 2021 im Alter vu 89 Johr z Berlin gstorbe.[3]
|
Dä Artikel basiert uff ere fräie Übersetzig vu dere Version vum Artikel „Urs_Jaeggi“ vu de dütsche Wikipedia. E Liste vu de Autore un Versione isch do z finde. |