Gena Rowlands | |
---|---|
Vida | |
Nacimientu | Cambria (es) , 19 de xunu de 1930[1] (94 años) |
Nacionalidá | Estaos Xuníos |
Llingua materna | inglés |
Familia | |
Padre | Edwin Myrwyn Rowlands |
Madre | Lady Rowlands |
Casada con | John Cassavetes (1954 – 1989) |
Fíos/es |
|
Estudios | |
Estudios |
Universidá de Wisconsin-Madison American Academy of Dramatic Arts 1952) Washington-Liberty High School (en) |
Llingües falaes | inglés[2] |
Oficiu | actriz de televisión, actriz de teatru, actriz de cine, actriz |
Premios |
ver
|
Nominaciones |
ver
|
IMDb | nm0001687 |
Virginia Cathryn Rowlands (19 de xunu de 1930, Cambria (es) ) ye una actriz de cine, televisión y teatru d'Estaos Xuníos. Ganadora de dos Globu d'Oru y de dos Premios Emmy.[3] Candidata a los Premiu Óscar y los Premios del Sindicatu d'Actores.[3] Conocida poles sos intervenciones en películes como A Women Under the Influence (1974), Gloria (1980), Night on Earth (1991), Hope Floats (1998), The Notebook (2004) y The Skeleton Key (2005).
En 2015, concediéron-y el Óscar honoríficu.[4]
Gena Rowlands nació en Madison, Wisconsin, Estaos Xuníos, el 19 de xunu de 1930.[5] Crióse na ciudá de Cambria.[5] El so padre, Edwin Myrwyn Rowlands, yera un banqueru y llexislador, y la so madre, Mary Allen, yera una pintora nacida n'Arkansas. La so familia treslladóse a Washington, D.C. en 1939 cuando'l so padre foi xubíu al Departamentu d'Agricultura.[5] Darréu camudáronse a Milwaukee en 1942 cuando'l so padre foi escoyíu como asesor del Office of Price Administration.[5] Asistió a la Universidá de Wisconsin dende 1947 hasta 1950. En 1950, treslladóse a Nueva York pa estudiar interpretación nel American Academy of Dramatic Arts.[5] Tuvo casada col actor y direutor John Cassavetes ente'l 9 d'abril de 1954 y el 3 de febreru de 1989, cuando ésti finó.[6] Tuvo tres fíos frutu del matrimoniu, Zoe R. Cassavetes, Alexandra Cassavetes y Nick Cassavetes, siendo ésti últimu direutor de cine.[5]
Pola so interpretación de Mabel Longhgetti en A Women Under the Influence (1974) ganó'l Globu d'Oru a la meyor actriz dramática y foi candidata al Óscar a la meyor actriz.[3] El filme foi dirixíu pol so home John Cassavetes, y la so actuación foi considerada pola revista People como una de los cien meyores interpretaciones de tolos tiempos.[5] Emanuel Levy escribió que "Rowlands ta magnífica como una ama de casa que crucia la llinia de la cordura".[7] En 1978 foi nuevamente nomada al Globu d'Oru pola so participación nel drama Opening Night.[3] Col thriller Gloria (1980) foi de nuevu candidata al Óscar y al Globu d'Oru a la meyor actriz dramática; la película tamién foi dirixida pol so maríu.[3] Variety señaló que "Gena Rowlands ta escelente como una muyer cansada que decide tomar les sos propies decisiones".[8]
La so trayeutoria nel cine siguiría con películes como Night on Earth (1991) o Something to Talk About (1995), protagonizada por Julia Roberts. En 1998 interpretó a la madre de Sandra Bullock nel drama Hope Floats; formó parte d'un repartu qu'incluyía nomes como'l d'Angelina Jolie, Ellen Burstyn y Sean Connery na comedia Playing by Heart, y trabayó con Sharon Stone en The Mighty. Darréu intervieno nel thriller Taking Lives (2004), y nel drama empobináu pol so fíu, y basáu nuna novela de Nicholas Sparks, The Notebook (2004) nel que dio vida a Allie Calhoun, personaxe que compartía en pantalla con Rachel McAdams. The Notebook ye la cinta más taquillera de la so filmografía con 115 millones de dólares recaldaos internacionalmente.[9] Al añu siguiente participó en The Skeleton Key (2005), con Kate Hudson.
Gena Rowlands trabayó en televisión en numberoses ocasiones, participando en series de televisión o telefilmes como Hallmark Hall of Fame (1983) pola que foi candidata al Globu d'Oru a la meyor actriz de repartu en serie, miniserie o telefilme.[3] En 1985 protagonizó'l telefime An Early Frost, siendo nomada al Globu d'Oru y al Emmy a la meyor actriz de miniserie o telefilme. En 1987 finalmente ganó'l Globu d'Oru a la meyor actriz de miniserie o telefilme y el Emmy a la meyor actriz de miniserie o telefilme por The Betty Ford Story, na qu'encarnaba a Betty Ford.[3][10] En 1992 volvió ser acreedora'l Emmy a la meyor actriz de miniserie o telefilme por Face of a Stranger (1991).[3] En 1993 pol so personaxe de Horona Swift en Crazy in Love llogró una nueva candidatura al Globu d'Oru. Otres intervenciones en televisión poles que Rowlands optó a los premios Emmy fueron The Color of Love: Jacey’s Story (2000) o Wild Iris, xunto a Laura Linney.[3]
Protagonizó xunto a Uma Thurman y Juliette Lewis el telefilme Hysterical Blindness (2002), ganando'l Emmy a la meyor actriz de repartode miniserie o telefilme y llogrando la so octava nominación a los Globos d'Oru.[3] Pola so interpretación del personaxe de Melissa Eisenbloom en What If God Were the Sun? (2007) foi candidata al Premiu del Sindicatu d'Actores a la meyor actriz de televisión de miniserie o telefilme y una vegada más al Emmy.[11][3] Foi la estrella convidada d'un capítulu de la serie Monk, protagonizada por Tony Shalhoub, llogrando la so octava candidatura a los premios Emmy, nesta ocasión como Primetime Emmy a la meyor actriz convidada - Serie de comedia meyor actriz convidada en serie de comedia.[3][12] Intervieno nun episodiu de NCIS en 2010.[13]
Filmografía destacada en cine y televisión.[14]
Añu | Categoría | Película | Resultáu |
---|---|---|---|
2015 | Óscar honoríficu | Ganadora | |
1980 | Meyor Actriz | Gloria | Candidata |
1974 | A Woman Under the Influence | Candidata |
Añu | Categoría | Película | Resultáu |
---|---|---|---|
2003 | Meyor Actriz de repartu de serie, miniserie o telefilme | Hysterical Blindness | Candidata |
1993 | Crazy in Love | Candidata | |
1988 | Meyor Actriz de miniserie o telefilme | The Betty Ford Story | Ganadora |
1986 | An Early Frost | Candidata | |
1984 | Hallmark Hall of Fame | Candidata | |
1981 | Meyor Actriz - Drama | Gloria | Candidata |
1975 | Opening Night | Candidata | |
1974 | A Woman Under Influence | Ganadora |
Añu | Categoría | Película | Resultáu |
---|---|---|---|
2009 | Primetime Emmy a la meyor actriz convidada - Serie de comedia Meyor Actriz convidada en serie de comedia | Monk | Candidata |
2007 | Meyor Actriz de miniserie o telefilme | What If the God Were the Sun? | Candidata |
2003 | Meyor Actriz de repartu de miniserie o telefilme | Hysterical Blindness | Ganadora |
2002 | Meyor Actriz de miniserie o telefilme | Wild Iris | Candidata |
2000 | The Color of Love: Jacey's Story | Candidata | |
1992 | Face of a Stranger | Candidata | |
1987 | The Betty Ford Story | Ganadora | |
1986 | An Early Frost | Candidata |
Añu | Categoría | Película | Resultáu |
---|---|---|---|
2007 | Meyor Actriz de televisión - Miniserie o telefilme | What If God Were the Sun? | Candidata |
1997 | Meyor Actriz | Unhook the Stars | Candidata |