Bruce pe Brus zo un anv-badez skosat saoznek. Dont a ra eus un anv-lec'h e Normandi : Brix (Brutius tro-dro 825, Bruoto e 1026 - 1027, Bruis e 1042, 1198, 1280)[1], er Manche, deuet da vezañ Brus pe Bruce e Breizh-Veur. Degaset e voe eno gant tiegezh ur marc'heg norman eus arme Gwilherm an Alouber. Dianav eo gwrizienn an anv Brix met kar e vefe da vBruz e Bro-Roazhon (Brud e 1067, Bruth e 1084)[2].
Izili eus an tiegezh-mañ a zeuas da vezañ roueed Bro-Skos er XIVvet kantved. Robert V Brus (1210-1295) a oa rejant met ne zeuas ket a-benn da vout roue. E vab-bihan Raibeart Brus pe Roperzh Iañ a zeuas a-benn e 1306 ha trec'h e voe war Edouarzh II, roue Bro-Saoz, e Bannockburn e 1314. E vab David Brus a voe roue war e lerc'h e 1329 dindan anv David II[3].