![]() |
En Weelendraier of Weelenhualer es en Giraat, diar em ön sin Wain becht, dat em diar jen of muar Weelen me langs fo ken.
Hat jeft dānen forskelig becht. Bi hok Wainern es uk en Weelenhualgiraat achtern iinbecht, dat em üttii ken üs en Sküüvkast.
En da jeft et Taakdraier, Kuplingsdraier, Tekseldraier en Draier, danen em iin ön di Wain benüti ken.
Ön Dütsklön wiar fuar en lung Tir bluat dat Tranportiarin fan Weelen ön di Taak töleten. Fan di Neđerlönen en Frankrik sen langsen muar Draier fuar achtern ön't Auto kemen.
Ön hok Lönen uur die Weelen büten ön di Busen transportiaret. Diartö es en Weelendraier ön di Fuarsir öf achtern montiaret.
Taakdraiern fuar't Weel nüti fuart miist di Fuarrochtingen üp die Wain (Taakreelingen of integriareti Taakdraiern) fuar die Weelenhualer of ja uur ön en ain Grünjdraier fastmaaket.
Bi di Kuplingsdraier uur di Önhingerkupling brükt, diar ön die Wain önbecht es.
Hat jeft Kuplingsdraier fuar tau, trii of fjuur Weelen.
Em ken di Draier fuar't Miist me di Weelen diar ön naa achtern kipi, dat em di Wain achtern iipen maaki ken.
Ön Dütsklön skel em en Forloof fuar di Bedriiv fan en Kuplingsdraier haa. Fuar di Draier sen Leechter en en Numernskelt fuarskrewen.
Fuar't Miist haa delings Giraaten en Steeker me 13 Pooli, hurfan 8 nütet uur. Dit es nöörig uuren, aurdat em en Leecht diar ön haa wel, wat ljucht, wan em töbeek köört. Di üđer Leechtern en uk dit Slütleecht fuar Töök ljucht uk me en 7poolige Steeker.
Wan em en 13pooligi Doos ön di Wain heer, da ken em uk en Kamera fuar achtern of en Warnsysteem önslut, aurdat em jaa di Kontakt fuar dit Töbeekköör-Leecht heer. Diar uur dit da me önslööten.
Fuar Uunimobiili en Kombiwainern jeft et Draiern, diar ön di Achterdüür fastmaaket uur. Des sen da fuar't Miist senerlig fuar en Typ fan Wain konstuiaret.
Fuar sok Weelenhualern uur niin ekstra Leecht brükt, en di ken hoogklapet uur. Dit Numernskelt fan di Wain mut uk me Draier en Weelen tö lees wiis.
Di Achterdüür giar fan dit Wecht swaarer iipen tö maaki, en di Düür uur diarfan noch ek beeter, das em diar bit tö fjuur Weelen (Ark Weel ombi 15 kg) en di Hualer ön fastmaaket.
Forskelige Wainern uur me en Systeem önböören, diar em üttii ken, om diar sin Weelen üp tö stel. Des Systeem jit Flexfix.
Des Systeem jeft et bluat fan Opel, en di haa diar uk en Patent üp. Wan em dit Auto me Flexfix bistelt, da ken em niin Önhingerkupling muar ön dit Auto haa.
Fuar iin ön di Wain jeft et Systeemi, hur em di Fuardergaafel fastmaaket. Di jit uk, dar em di Fuarderweelen ütbech skel en dat di Plaats iin ön di Wain aartig wat mener uur.
Me sok Systeemi ken em lik sa waker köör üs wan em niin Weelen me langs heer, en fuar en Tērbörstel en hok Paar Höösen leengt di Plaats jaa wes likert.
Uk fuar Busi jeft et Weelendraiern. Sa ken di Plaats iin ön di Bus fuar Rulstöölern of Jungenskreren nütet uur.
Em tört uk ek töögen di Winj töbeek laap, wan em me di Winj fan achtern löpen es.
![]() |
Didiar artiikel as di 1. Oktuuber 2014 uun det list faan gud artiikler, diar det leesen luane apnimen wurden. Uun uugenblak jaft at diar 73 faan. |