Choephoroe (Graece Χοηφόροι) sunt tragoedia Graeca antiqua poetae Aeschyli. Secunda pars trilogiae Oresteae erat quae anno 458 a.C.n. Dionysiis palmam rettulit. Praecedebat Agamemnon, sequebantur Eumenides. In hac secunda parte poeta matricidium Orestis scaenice retractabat. Post Aeschylum et Sophocles et Euripides eandem fabulam tragice elaborarunt. Titulus mulieres chori designat qui ancillis libamenta (Graece χοή) ad Agamemnonis monumentum in parodo ferentibus (Graece φορός) constabat.
Res Argis pro Atridarum palatio geruntur.
Ut in Agamemnone Aeschylus in Choephoris ostendit quomodo sanguis semel effusus novas semper caedes provocet, sine fine[4]. Ita in prima fabula Agamemnonis caedes (actio) caedem Aegisthi et Clutemnestrae (reactio) in secunda fabula provocat donec scelesta series in tertia fabula per iudices et orationis persuasionem dilueretur (solutio).